Usı jıldıń 24-fevral kúni Ekonomika fakultetinde Ózbekstan Respublikası Oliy Majlis Nızamshılıq palatası deputatı Ruslan Djumamuratov hámde Aral Sea discovery kárxanasınıń baslıǵı Tazabay Uteuliev qatnasıwında student jaslar menen ushırasıw bolıp ótti. Ushırasıw dawamında deputat tárepinen Húrmetli Prezidentimizdiń Oliy Majlis hám Ózbekstan xalqına jollaǵan Múrájat mazmunına keń túrde toqtalıp, bul jılı elimizde isbilermenlik hám kishi biznesti rawajlandırıwǵa ele de kóbirek itibar qaratılıp, ásirese Qaraqalpaqstanlı isbilermenler ushın bir qatar salıq jeńillikler engiziliwin atap ótti. Sonıń menen birgelikte Aral Sea discovery kárxanasınıń baslıǵı Tazabay Uteuliev isbilermenlik háreketin tártipke salıwdıń anıq maqset hám shegaraların belgilew, isbilermenlik subektleri tárepinen jańa ónim hám xızmet túrlerin engiziw ushın qolaylı sharayatlar jaratıw arqalı olar ushın tártipke salıw júgin azaytıw, sonday-aq, Ózbekstan Respublikası Prezidentiniń 2022-jıl 28-yanvardaǵı «2022-2026-jıllarǵa mólsherlengen Jańa Ózbekstannıń rawajlanıw strategiyası haqqında»ǵı PP-60-sanlı Pármanınıń áhmiyeti sol qatarda Prezidentimizdiń basshılıǵında elimizde kishi biznes hám jeke isbilermenlikti rawajlandırıw, olardı qollap-quwatlaw baǵdarında ámelge asırılıp atırǵan keń kólemli jumıslarǵa toqtap ótti. Atap ótilgenindey, sońǵı jıllarda Respublikada isbilermenlikti rawajlandırıw, investiciyalardı tartıw hám biznes júrgiziw ushın qolaylı ortalıq jaratıw, isbilermenlerdiń nızamlı máplerin qorǵawdıń huqıqıy kepilliklerin bekkemlew tarawında keń kólemli jumıslar ámelge asırılmaqta. Sonıń ishinde, salıq sisteması túp-tiykarınan reformalandı, ruxsat beriwshi hújjetlerdi alıw tártibi sezilerli dárejede ápiwayılastırıldı, isbilermenlik subektleriniń finans-xojalıq jumısına baylanıslı bolmaǵan jobalı tekseriwler biykarlanǵanın ayrıqsha atap ótti.
