Usı jıldıń 9-mart sánesinde Sanaat texnologiyası fakultetinde Texnologiyalıq mashina hám úskeneler bakalavr tálim baǵdarında bilim alıp atırǵan student-jaslardıń ata anaları menen ushırasıw keshesi bolıp ótti. Ushırasıwdı fakultet dekanı R.Qurbaniyazov kiris sóz benen ashıp beridi hám kún tártibindegi másele boyınsha bayanat qıldı.
Kún tártibindegi másele búgingi kúnde Joqarǵı bilimlendiriw sistemasında bolıp atırǵan jańalıqlar, Qaraqalpaq mámleketlik universitetinde studentler ushın jaratılǵan imkaniyatlar menen ata-analardı tanıstırdı hám tálim-tárbiya jumısları, professor-oqıtıwshılardıń ata-analar menen birge tálim-tárbiya jumısların jáne de jaqsılaw, student-jaslardı milliy ideologiyaǵa sadıq etip tárbiyalaw, student-jaslar arasında huqıqbuzarlıq, jınayatshılıq hám náshebentlikke qarsı gúresiwge, kiyiniw mádeniyatı, ǵalabalıq qáwipler kórinislerinin jaslar tárbiyasına keri tásiri hám onıń aldın alıwǵa qaratılǵan wazıypalar haqqında aytılıp ótildi. Sonday aq, ushırasıwda student-jaslardıń bos waqıtların mazmunlı hám kewilli ótkeriw, studentlerdiń sabaq tayarlaw, óz ústinde jumıs islewi, dem alıwı, sport, hám basqa dógerek, klublarǵa qatnasıwı ushın universitette jaratılǵan barlıq shárayatlar (internet xanaları, sport sekciyaları, dógerekler, studentler turar jayındaǵı shárayatlar) haqqında ata-analarǵa maǵlıwmatlar berildi. Student-jaslardıń bunday imkaniyatlardan durıs paydalanıwları hám studentlerdiń oqıw dáwirinde professor-óqıtıwshılar hám oqıwdan tıs waqıtlarda ata-analar perzentlerin qatań qadaǵalaw kerekligi haqqında ayrıqsha toqtap ótildi. Ushırasıw keshesinde ata-analarǵa perzentleriniń erisken tabısları, ayırım jaslar tárepinen jol qoyılǵan kemshilikler haqqında tolıq maǵlıwmatlar berildi hám ushırasıwǵa kelgen ata-analarǵa minnetdarshılıq bildirildi.
Bunnan soń kún tártibindegi másele boyınsha fakultet dekan orınbasarları Sh.Musirov, Í.Usmanov, Sanaat texnologiyası kafedrası baslıǵı A.Mámbetsharipova, fakultet hayal-qızlar máseleleri boyınsha dekan másláhátshisi B.Artıqbaevalar sózge shıǵıp Sanaat texnologiyası fakulteti studentleri ushın ámeldegi kredit modul sisteması hámde Hemis platformasına studentlerdiń maǵlıwmatlarınıń jaylastırılıwı haqqında tolıq maǵlıwmatlar berildi, sonın menen birge, studentlerdiń kontrakt tólemmleri, boyınshada keńnen túsinikler berip ótti hám studentlerdiń bilim alıwında, tálim-tárbiya jumıslarıda ata analardıń tutqan ornı, fakultetdegi professor oqıtıwshılardıń sabaq beriw metodları haqqında aytıp jıynalıs barısında aytılǵan maǵlıwmatlarǵa óziniń pikir hám usınısların bildirdi.
Kún tártibindegi máseleler boyınsha bayanatshılarǵa ata-analar ózleriniń qızıqtırǵan sorawlarına tiyisli juwaplar aldı.
