Berdaq atındaǵı Qaraqalpaq mámleketlik universiteti Sanaat texnologiyası fakultetinde Qarakalpaqstan Respublikası Ishki isler Ministrligi Jol háreketi qáwipsizligi basqarması qánigeleri menen «Házirgi wqıtta júz berip atırǵan jol háreketi qaǵıydaların buzıwshılıq, jol transportı menen baylanıslı hádiyseler, olardıń aldın alıw is ilajları» haqqında student-jaslar menen ushırasıw bolıp ótti. Ushırasıwdı fakultet dekanı Rashid Qurbaniyazov ashtı hám alıp bardı. Ol óz sózinde Húrmetli Prezidentimiz tárepinen mámleketimizde ámelge asırılıp atırǵan reformalar, jaslarǵa jaratılıp atırǵan múmkinshilikler haqqında toqtalıp ótti. Sonday-aq, student-jaslar arasında júz berip atırǵan jınayatlar hám huqıq buzarlıqlar, solardıń qatarında eń kóp ushırasıp atırǵanı jol transport penen baylanıslı bolıp atırǵanı, olardıń keltirip shıǵarıp atırǵan ayanıshlı aqıbetleri haqqında túsinikler berip ótti.
Bunnan soń, Qaraqalpaqstan Respublikasi Ishki Isler Ministrligi Jol háreketi qáwipsizligi basqarması inspektorları Tursınbay Utemuratov, Yulduzxan Matyakupova, Timur Qurbanbaevlar sózge shıǵıp, olar óz sózinde házirgi kúnde áhmiyetli máselelerdiń biri bolǵan jol háreketi qaǵıydaları hám olarǵa boysınbaw nátiyjesinde kelip shıǵatuǵun unamsız waqıyalardıń aldın alıw ushın ámelge asırılıp atırǵan is-ilájlar haqqında toqtalıp ótti. Jáne de, barlıq qatnasıwshılarǵa jeke transport qurallarınan paydalanǵan waqıtta jol háreketi qaǵıydalarına tolıq ámel etiw kerek ekenligi haqqında eskertip, jeke transport quralların qarawsız qaldırmaw kerekligi haqqında aytıp ótti. Sonıń menen bir qatarda jol háreketi qaǵıydaların buzǵan shaxslarǵa nızam tárepinen arnawlı sharalar kóriliwi boyınsha túsinikler berildi. Ushırasıw dawamında Yu.Matyakupova aqırǵı waqıtlarda júz berip atırǵan jol transport hádiyselerinde jaslardıń qatnası, spirtli ishimlikler iship transport basqarıw, piyadalar ótiw jollarında, svetoforlar menen baylanıslı hádiyseler kóp ushırasıp atırǵanlıǵı haqqında toqtalıp ótti. Ushırasıwda qatnasıwshılar joqarıdaǵı máseleler boyınsha ózleriniń qızıqtırǵan sorawların berip, taraw qánigeler tárepinen tiyisli juwaplar aldı.
