Elimizde jas áwladtıń fizikalıq hám ruwxıy jaqtan salamat bolıp ósiwi, sonıń menen birge olardıń bos waqıtların mazmunlı shólkemlestiriw hám de jaslardı ǵalabalıq sportqa keńnen qamtıw boyınsha bir qatar reformalar ámelge asırılmaqta. Xabarıńız bar futbol boyınsha U-20 Aziya kubogı finalı ushırasıwında Ózbekstan saylandı komandası Iraqtı 1-0 esabında jeńip chempion bolǵan edi. Ózbekstan saylandı komandası qurmanıda Qaraqalpaqstanlı jas futbolshı Javohir Utemuratovta bar.
Usı jıldıń 23-mart kúni QMU Dene mádeniyatı fakultetinde chempion futbolshı Javohir Utemuratov penen ushırasıw bolıp ótti. Ushırasıwǵa Dene mádeniyatı fakulteti dekanı N.Kaypov, dene mádeniyatı teoriyası hám metodikası kafedrası baslıǵı B.Erimbetov, Qaraqalpaqstan Respublikası Futbol associaciyası baslıǵı I.Ibragimov, futbolshı J.Utemuratov, professor-oqıtıwshılar hám student-jaslar qatnastı.
Ushırasıwda qatnasıwshılar jas futbolshını chempionlıq penen qutlıqlap, onıń ómiri, sportqa kirip keliwi, erisken jetiskenlikleri hám chempionlıq sırları haqqında sóz etildi hám de studentler ózleriniń qızıqtırǵan sorawların berdi. Ushırasıwda Qaraqalpaqstan Respublikası Futbol associaciyası menen birgelikte fakultetimizde futbol tálim baǵdarında oqıp atırǵan studentlerge birgelikte shınıǵıwlar alıp barıw hám master klasslar ótip barıw boyınsha tıǵız birge islesiwdi jolǵa qoyıw kelisip alındı.
Ushırasıwdı ótkeriwden maqset studentlerge motivaciya beriw, futboldı jáne de rawajlandırıw hám jaslar arasında keńnen en jaydırıw bolıp tabıladı.
R.Óteniyazov
Dene mádeniyatı fakultetiniń
jaslar menen islesiw boyınsha dekan orınbasarı
