«Ilim, bilim hám óndiris» integratsiyasın ámelge asırıw maqsetinde usı jıldıń 7-aprel kúni Ózbekstan Respublikası Prezidenti janındaǵı Statistika Agentligi hám Qaraqalpaqstan Respublikası statistika basqarması qánigeleri menen Qaraqalpaq mámleketlik universiteti «Ekonomika» fakultetiniń professor-oqıtıwshıları hám student-jasları menen birgelikte oqıw seminarı shólkemlestirildi. Seminarǵa fakultet dekanı K.Kudiyarov, «Buxgalteriyalıq esap hám audit» kafedrası baslıǵı Z.Tajekeev, Ózbekstan Respublikası Prezidenti janındaǵı Statistika Agentligi «Isbilermenlik ortalıǵı baqlawları, isbilermenlikti rawajlandırıw statistikası» basqarması baslıǵı M. Satimov, QR statistika basqarması «Isbilermenlik ortalıǵı baqlawları, biznesti rawajlandırıw statistikası» bólimi baslıǵı R.Sharibaev, Buxgalteriyalıq esap hám audit» kafedrası professor-oqıtıwshıları hám ekonomika fakulteti student-jasları qatnastı.

Seminarda Statistika Agentligi «Isbilermenlik ortalıǵı baqlawları, biznesti rawajlandırıw statistikası» basqarması baslıǵı M.Satimov «Kishi biznes subyektleri statistikası kórsetkishlerin qáliplestiriw» temasında, QR statistika basqarması «Isbilermenlik ortalıǵı baqlawları, biznesti rawajlandırıw statistikası» bólimi baslıǵı R.Sharibaev «Kishi biznes hám jeke isbilermenlik subyektleri statistikası huqıqıy tiykarları hám olardıń kórsetkishlerin qáliplestiriw tártibi» temasında bayanat jasap, kishi biznes subyektleri huqıqıy tiykarları hámde statistikalıq kórsetkishlerdiń qáliplesiwi, kishi biznes subyektleri iskerligi boyınsha saylanba baqlawlardı ótkeriw usılları, kishi biznes subyektleri statistkası maǵlıwmatların baspadan shıǵarıw hám jariyalaw tártibi haqqında túsinikler berdi.

Seminar qatnasıwshıları ózleriniń qızıqtırǵan sorawlarına juwaplar aldı hám studentler tárepinen, ámeliyat ótew, jumıs beriwshilerge volontyor sıpatında biriktiriw hám jumıs beriwshilerdiń mákemelerinde «5+1» formatında «karyera kúni»n shólkemlestiriw boyınsha usınıslar berildi.