Kitap oqıw insannıń oylaw hám pikirlew qábiletin shınıqtırıp, ruwxıy dúnyasın bayıtadı. Sonlıqtan, «Kitap oqıǵan bir adam televizor kórip otırǵan on adamdı basqaradı», dep biykarǵa aytılmaǵan. Sońǵı jıllarda mámleketimizde jaslar arasında kitapqumarlıq mádeniyatın rawajlandırıw maqsetinde bir qansha unamlı isler ámelge asırılmaqta. Jaslarımızdıń kitap oqıwǵa bolǵan qızıǵıwshılıǵın qáliplestiriw ushın ótkerilip atırǵan hár qıylı kórik-tańlawlar hám ruwxıy-mádeniy ilajlar usı jolda qoyılıp atırǵan dáslepki qádemlerden esaplanadı. Usı jıldıń 10-15-aprel kúnleri Respublikalıq kitapxanada ótkerilip atırǵan «III Respublika kitapqumarlıq hápteligi» mine, usınday ilajlardıń biri.

Usı háptelikke universitetimiz Tariyx fakultetiniń tyutorları B.Esemuratova menen G.Esboganovalardın basshılıǵında Sociologiya qánigeliginiń 1-kurs hám Tariyx qánigeliginiń 2-kurs studentleri qatnastı. Universitet jasları arasında kitapqumarlıqqa qızıǵıwshı studentler kópshilikti quraydı. Mine, usınday bilimli jaslarımızdıń biri Tariyx fakultetiniń «Kitapqumarlar dógeregi» lideri Abdireymova Feruza usı ilajda shıǵıp sóyledi. Ol óz shıǵıp sóylewinde kitapqumarlıq boyınsha qolǵa kirgizgen jetiskenlikleri haqqında, atap aytqanda, «Jas kitapqumar» tańlawınıń 15-19 jas aralıǵında ótkerilgen Qaraqalpaqstan basqıshında jeńimpaz bolıp, Tashkent qalasında bolıp ótken Respublika basqıshında belsene qatnasıp qaytqanlıǵı haqqında aytıp ótti. Kitapqumarlıq hápteliginde I.Yusupov atındaǵı intalı balalar mektebiniń bir qatar oqıtıwshıları da shıǵıp sóyledi. Háptelik dawam etpekte.

B.Esemuratova,
Tariyx fakulteti tyutorı