Búgin 14-aprel kúni Berdaq atındaǵı Qaraqalpaq mámleketlik universiteti jámáátiniń 2021-2023 jıllarǵa dúzilgen Jámáátlik shártnamasınıń 2022-jılı orınlanıwı boyınsha hám Qaraqalpaq mámleketlik universiteti rektoratı hám kásiplik awqam komiteti arasında 2023-2025-jıllarlarǵa jámáátlik shártnamasın qabıllaw haqqında konferenciya bolıp ótti. Onda Ózbekstan bilimlendiriw hám ilim xızmetkerleri kásiplik awqamı Qaraqalpaqstan Resapublikası boyınsha juwaplı shólkemlestiriwshisi R.Abduraxmanov, fakultet dekanları, cex baslıqları, professor-oqıtıwshılar, kásiplik awqam belsendileri qatnastı. Konferenciyanı universitetimizdiń Monitoring hám ishki qadaǵalaw bólimi baslıǵı U.Asanov ashıp berdi hám alıp bardı.
Konferenciyada Qaraqalpaq mámleketlik universiteti rektoratı hám kásiplik awqam komiteti arasında xızmetkerlerdiń sociallıq-ekonomikalıq, huqıqıy máplerin qorǵaw boyınsha 2021-2023 jıllar ushın dúzilgen jámáátlik shártnamasınıń 2022-jılı orınlanıwı haqqında universitetimiz kásiplik awqam komiteti baslıǵı A.Alliyarovtıń esabatı tıńlandı. Bunnan soń, universitetimizdiń Nuranıylar keńesi baslıǵı B.Abdikamalov sózge shıǵıp búgingi kúnde universitetimiz rektoratı hám kásiplik awqam komiteti arasında 2021-2023-jıllar ushın dúzilgen Jámáátlik shártnama arqalı 2022-jıl dawamında mádeniy hám sport ilajları, sonday-aq, hár jılı bayram sánelerinde universitette jumıs alıp barǵan hám islep atırǵan veteran xızmetkerler, aldınǵı professor-oqıtıwshılar hám ziyrek studentlerdiń miynetleri rektorat hám kásiplik awqamı komiteti tárepinen bahalanıp, bir qansha dıqqatqa ılayıqlı jumıslar ámelge asırılıp kiyatırǵanlıǵın ayap ótti hám aldaǵı jumıslarında tabıslar tiledi. Sonıń menen birge, Qaraqalpaq mámleketlik universiteti rektoratı hám kásiplik awqam komiteti arasında 2023-2025-jıllarlarǵa jámáátlik shártnamasın qabıllaw boyınsha dawısqa qoyılıp, delegatlar tárepinen maqullandı.
