Usı jıldıń 18-aprel kúni Berdaq atındaǵı Qaraqalpaq mámleketlik universiteti Ximiya-texnologiya fakultetinde ulıwma bilim beriw mektepleriniń ximiya páni muǵállimleri menen ushırasıw bolıp ótti. Onda Qaraqalpaqstan Respublikası Pedagoglardı jańa metodikalarǵa úyretiw milliy oray «Anıq hám tábiyiy pánler metodikası» kafedrasınıń ximiya páni aǵa oqıtıwshısı A.Esnazarov Berdaq atındaǵı Qaraqalpaq mámleketlik universiteti rektorı A.Reymov, fakultet dekanı B.Nurımbetov hám professor oqıtıwshılar qatnastı. Ushırasıwda rektor A.Reymov universitet professor-oqıtıwshılarınıń ulıwma bilim beriw mektepleri menen birge islesiw, olarǵa ximiya pánin oqıtıwda ushırasıp atırǵan mashqalalar, olardıń sheshimin birgelikte islesiw arqalı saplastırıw múmkin ekenligin aytıp ótti.
Bunnan soń, mektep muǵállimleri universitetmizdiń Ximiya-texnologiya fakultetinde bolıp, fakultet turmısı menen jaqınnan tanıstı. Olar fakultettegi ximiya laboratoriyaların, oqıw auditoriyaları, fakultette islep atırǵan professor-oqıtıwshılardıń ilimiy iskerligi menen jaqınnan tanıstı. Ushırasıw dawamında óz-ara pikir almasıp hám aldaǵı waqıtları birge islewge kelisip alındı.
