Ximiya-texnologiya fakultetinde bilimlendiriw tarawı wákilleri menen ushırasıw bolıp ótti. Ushırasıwda universitetimiz marketing xızmeti bólimi qánigesi F.Maqsetov, Shımbay rayonına qaraslı 38-sanlı mekteb direktorı G.Abdullaeva, Qaraqalpaq Mámleketlik Universiteti akademiyalıq licey metodisti A.Yusupov, fakultet professor oqıtıwshıları hámde 4-kurs studenleri qatnastı.
Ilajdı fakultet dekanı B.Nurımbetov kiris sóz benen ashıp, pitkeriwshi kurs studentlerin jumıs benen támiynlew máselesinde búgingi kúnde fakultette alıp barılıp atırǵan jumıslarǵa toqtap ótip, kelgen miymanlarǵa fakultet haqqında, 2022/2023 oqıw jılında pitkeriwshiler haqqında maǵlıwmatlar berip ótti.
Shımbay rayonına qaraslı 38-sanlı mektep direktorı G.Abdullaeva sózge shıǵıp, bárlıq pitkeriwshi studentlerge dáslep jaqsı nátiyjeler menen pitkerip shıǵıwına tilekles ekenlenligin aytıp, onnan soń ózi islewshi mektep haqqında, mektepte jaratılǵan keń imkanyatlar haqqında atap ótti. Bul mektepte 2000 nan aslam oqıwshılar bilim alıp, tiykarın rus tilinde oqıwǵa qánigelesken mektep bolıp, ximiya, biologiya, fizika sıyaqlı sabaqlardan rus tilinde sabaq beriwshi qánigelerdiń júda kerek ekenligin hámde óz qánigeligin jaqsı meńgergen student-jaslar bolsa olardı álbette jumıs penen támiyinleniwin atap ótti.
Bunnan soń, Qaraqalpaq mámleketlik universiteti akademiyalıq licey metodisti A.Yusupov sózge shıǵıp, pitkeriwshi kurs studentlerine muǵallimshilik degen kásip úlken juwapkershilikti talap etiwin, buǵan biyparıq bolmastan juwapkershilik penen qaraw kerek ekenligin aytıp, akademiyalıq licey haqqında tolıq maǵlıwmat berdi. Ol jerde jumıs islewshi hár bir qánigeden kúshli bilim talap etiletuǵın, ol jerde bilim alıp atırǵan oqıwshılardıń bilim dárejesi kúshli ekenin, ótken oqıw jılında licey pitkeriwshileriniń joqarı oqıw ornına kiriw kórsetkishi 82% bolǵanlıǵın, bunday nátiyjege erisiw ushın licey oqıtıwshılarına qoyılatuǵın talap júdá kúshli ekenligin aytıp ótip, jaqsı ziyrek studentlerdi liceyge islewge shaqırdı.
Universitet marketing xızmeti bólimi qánigesi F.Maqsetov pitkeriwshi kurs studentlerin jumısqa jaylastırıw boyınsha universitet tárepinen bir qansha jumıslar alıp barılıp atırǵanlıǵın, universitet, student hám jumıs beriwshiler arasında dúziletuǵın úsh tárepleme shártnamaların óz waqtında hám durıs toltırılıwınnıń zárúr ekenlgigi haqqında, universitet basshıları tárepinen jaqın kúnlerde ótkeriliwi rejelestirilip atırǵan miynet yarmarkasına studentlerdiń belsene qatnasıwı kerekligin atap ótti.
Fakultet professor oqıtıwshıları Z.Uzaqbergenova hámde A.Sharipovalar sózge shıǵıp, berilip atırǵan usınday imkanyatlardan keńnen paydalanıp, hár bir pitkeriwshi óz imkanyatıńızdı sınap koriw, waqıttı bosqa jibermew kerekligi hám aldaǵı waqıtları 4-kurs pitkewishi jaslarınıń pedogogiklıq ámeliyatların rayonlar kesiminde shólkemlestiriw kerek ekenligin usınıs etti.
Ushırasıw qatnasıwshıları búgingi kúnde mámleketimiz tárepinen jaslardıń bilim alıwları ushın jaratıp bergen imkanyatlardan durıs hám orınlı paydalanıwımız kerek ekenligin, oqıwdı pitkergennen soń óz kásibiniń mamanı bolıp, elimizdiń rawajalnıwna óz úlesin qosatuǵın qánigeler bolıp jetilisiwine barlıq jaslardı shaqırıp qaldı.
Ushırasıw sońında student-jaslar ózleriniń qızqtırǵan sorawlarına juwaplar aldı.
Ximiya-texnologiya fakulteti jetekshisi
Nilufar Kuzdibaeva
