Usı jıldıń 19-aprel kúni Berdaq atındaǵı Qaraqalpaq mámleketlik universitetinde Qaraqalpaqstan muzıka mádeniyatınıń talantlı, kórkem óner ǵayratkeri Marqabay Jiemuratovtın 80 jıllıǵı hám Qaraqalpaqstan xalıq shayırı Nabira Tóreshovanıń 70 jasqa tolıwı múnásibeti menen ushırasıw keshesi bolıp ótti.
Onda belgili kompozitorlar, kórkem óner taraw wákilleri, professor-oqıtıwshılar, nuraniylar hám student-jaslar qatnastı. Ilajdı universitetimizdiń Jaslar máseleleri hám ruwxıylıq-aǵartıwshılıq isleri boyınsha prorektorı S.Alawatdinov ashıp berdi hám alıp bardı. Ol óz sózinde Húrmetli Prezidentimiz tárepinen mámleketimizde Mádeniyat hám kórkem óner tarawın rawajlandırıw baǵdarında júrgizilip atırǵan jumıslardıń nátiyjeliligin arttırıw hám taraw xızmetkerlerin qollap-quwatlaw, olarǵa múnásip sharayatlar jaratıwǵa baǵdarlanǵan bir qatar párman hám qararlar qabıl etilgenligin aytıp ótti. Sonday-aq kórkem óner tarawına pidayılıq penen bar kúsh jigerin arnap, onı jekke mápten kóre ulıwmaxalıqlıq máp ushın xızmet etiwdey ullı maqsetler jolında pidá etken Qaraqalpaq muzıka mádeniyatınıń rawajlanıwına óziniń ájayıp shıǵarmaları menen salmaqlı úles qosqan belgili kompozitor Marqabay Jiemuratov, hám onıń ómirlik joldası házirde 70 báhárin qarsı alǵan ustaz Qaraqalpaqstan xalıq shayırı Nabira Tóreshovanı 70 jıllıq yubileyi menen universitetimiz jámááti atınan qızǵın qutlıqladı.
Bunnan soń, sózge shıqqanlar ustazdıń dóretiwshilik miynetleri ómir jolı, kórkem óner tarawındaǵı miynetleri, sonday-aq, tınıp-tınshımas dóretiwshi insan sıpatında Ǵárezsizlik dáwirimizdi, Xalqımızdıń ullılıǵın, aydın keleshegin jırlaytuǵın ájayıp shıǵarmalar dóretkenligin óz bayanatlarında keltirip ótti. Ilaj dawamında Berdaq atındaǵı Qaraqalpaq mámleketlik universiteti Kórkem óner fakulteti tárepinen belgili kompozitor Marqabay Jiemuratovtıń dóretken namalarına qosıqlar aytıldı. Bizde óz gezeginde Qaraqalpaqstan muzıka mádeniyatınıń talantlı, kórkem óner ǵayratkeri óz isiniń haqıyqıy pidayısı bolǵan insan Marqabay Jiemuratovtın 80 jıllıqǵı hám Qaraqalpaqstan xalıq shayırı Nabira Tóreshovanıń 70 jıllıq yubileyi menen universitetimiz jámááti atınan qızǵın qutlıqlaymız, shańaraǵına amanlıq, qut-bereket hám baxıt tileymiz. Ustazımız Marqabay Jiemuratovtıń talapshańlıǵı, óz kásibine bolǵan pidayılıǵı, onıń islegen qayırlı isleri, biziń qálbimizde máńgi saqlanıp qaladı.
QMU baspasóz xızmeti
