Berdaq atındaǵı Qaraqalpaq mámleketlik universitetinde búgin 28-aprel kúni belgili tariyxıy tulǵa, óziniń tákirarlanbas dóretiwshiligi menen pútkil dúnya júzilik ilim-pán tariyxında óshpes iz qaldırǵan ullı babamız Abu Rayhan Beruniy tuwılǵanlıǵınıń 1050 jıllıǵına baǵıshlanǵan “Qaraqalpaqstan tariyxınıń aktual máseleleri: ótmishi hám búgini” atamasındaǵı respublikalıq ilimiy-ámeliy konferenciyası bolıp ótti. Atap ótiwimiz kerek, ǵárezsizlikke eriskenimizden keyin bay tariyxıy miyraslarımızdı qayta tiklew, olardı keleshek áwladlarǵa óz halında jetkeriw, mámleketimiz tariyxında úlken orın tutqan ata-babalarımızdıń atların máńgilestiriw barısında keń kólemli ilajlar alıp barılmaqta.
Bul respublikalıq ilmiy-ámeliy konferenciyanıń ótkeriliwinen tiykarǵı maqset Qaraqalpaqstan tariyxınıń aktual máselelerine sheshim tabıw, úlkemiz tariyxın izertlewde Abu Rayhan Beruniy ilimiy miyrasınıń áhmiyetin úyreniw, bul baǵdardaǵı taraw alımlarınıń ilimiy tiykarlanǵan usınısların islep shıǵıw boyınsha birge islesiwdi rawajlandırıw bolıp esaplanadı.
Ilmiy-ámeliy konferenciyanı Ilimiy isler hám innovaciyalar boyınsha prorektor I.Turdımambetov ashıp berdi hám basqarıp bardı. Konferenciyaǵa universitettiń “Tariyx” fakulteti “Ózbekstan hám Qaraqalpaqstan tariyxı” hám “Arxeologiya” kafedraları, respublikamızdıń jetekshi joqarı oqıw orınları hám Ózbekstan Respublikası Ilimler Akademiyasınıń Qaraqalpaqstan bólimi Gumanitar ilim-izertlew institutınıń ilimpazları, professor-oqıtıwshıları, jas alımlar, tayanısh doktorantlar, magistrantlar belsendi túrde qatnastı. Ilimiy-ámeliy konferenciyada t.i.d., professor B.Qoshanov, t.i.k., docent J.Aytmuratov, t.i.d (DSc) A.Jumashev, t.i.k., docent M.Seytimbetov, t.i.k., docent J.Hakimniyazov hám taǵı basqalar shıǵıp sóylep, ullı babamız Abu Rayhan Beruniydıń ilimiy miyrasınıń Qaraqalpaqstan tariyxın úyreniwdegi hám keleshek áwladtı tárbiyalawdaǵı áhmiyetine ayrıqsha toqtalıp ótti. Sonday-aq, konferenciya juwmaǵına kóre, kóterilgen máseleler tiykarında bildirilgen pikir hám usınıslar ulıwmalastırılıp, joqarı turıwshı mámleketlik mekemelerge jiberiliwi boyınsha sheshimge kelindi.
Respublikalıq ilmiy-ámeliy konferenciya jumısı sekciyalarǵa bólingen halda dawam ettirildi hámde joqarı shólkemleskenlik, qızıqlı pikir alısıwlarǵa bay tárizde ótkerildi.
