Usı jıldıń 28-aprel kúni Qazaqstan Respublikası Qaraǵandı qalasındaǵı “Bolashaq” akademiyasında “Házirgi dúnyada ilim hám bilim” atamasında xalıq aralıq ilimiy-ámeliy konferenciya bolıp ótti.

Oǵan Qaraqalpaq mámleketlik universiteti professorı Sh.Abdinazimov qatnasıp “Lingvokulturologiya – til biliminiń jańa tarawı” temasında bayanat jasadı.

Konferenciyaǵa ǴMDAnıń birneshe joqarı oqıw orınlarınan, atap aytqanda, Rossiya Federaciyası, Turkiya, Ukraina, Belarus, Tájikistan hám Ózbekstanlı ilimpazlar qatnastı.

Konferenciya 8 sekciyada óz jumısın alıp bardı hám hárbir sekciyada házirgi zaman ilimlerindegi áhmiyetli máseleler dodalandı.

Sonıń menen birge, professor Sh.Abdinazimov Qaraǵandı universitetinde lekciyalar da oqıdı.

Atap ótiw kerek, professor Sh.Abdinazimov xalıq aralıq ilimiy joybarlar, konferenciyalarǵa belsene qatnasıp, kópshilik joqarı oqıw orınları tárepinen lekciya sabaqların ótiwge mirát etilmekte.

Ol 1994-jılı Turkiyanıń paytaxtı Ankara qalasında 6 ay dawamında «Túrkiy tilleriniń salıstırmalı grammatikası» baǵdarlaması orınlawshılarınıń biri bolǵan edi. 2017-2018-jılları Astanadaǵı Evraziya universiteti ilimpazları menen birlikte «Qazaq hám qaraqalpaq tilleriniń salıstırmalı grammatikası» joybarın orınlap 2017-jılı Astanada, 2018-jılı Almatı qalalarında monografiyası járiyalanǵan edi.

2019-jılı Qıtay mámleketiniń baslaması menen «Bir mákan – bir jol» joybarı tiykarında«Ózbekstannıń tillik korpusın qáliplestiriw» degen temadaǵı kishi joybarǵa qatnastı.

Súwrette: “Bolashaq” akademiyasınıń rektorı G.Rısmaǵanbetova (oń tárepte), professor Sh.Abdinazimov (ortada), akademik, professor K.Sembiev (shep tárepte).