Usı jıldıń 4-may kúni Qurılıs fakultetinde «Salamat shańaraq-Watanımız tiregi» uranı astında student-qızlardı shańaraqqa tayarlaw, olardı medicinalıq jaqtan bilimlerin jetilistiriw maqsetinde student-qızlar arasında «Azada qızlar» kórik-tanlawı bolıp ótti. Tańlawdıń maqseti student qızlardıń oqıwda hám jámiyetlik jumıslarda belsendiligin arttırıw, olarda ana-Watanǵa sadıqlıq, pidayılıq sezimlerin ele de rawajlandırıw, student-qızlardıń reproduktivlik salamatlıq hám salamat turmıs tárizin qáliplestiriw, sonday-aq, qızlarımızdı shańaraqqa, keleshek turmısqa tayarlaw, ózleri tańlaǵan qánigeliklerine súyispenshiligin arttırıw, milliy úrp-ádet dástúrlerimizdi, ádep-ikramlılıq, iybelilik sıyaqlı pazıyletlerdi úgit-násiyatlaw bolıp tabıladı.
Tańlaw tórt shártten ibarat bolıp, birinshi shárti tanıstırıw shárti bolıp, bul shártte hár bir qatnasıwshı qız ózi haqqında tanıstradı.
Ekinshi shártte jana tuwılǵan balanı qundaqlaw shárti bolıp, bul shártte qatnasıwshılar belgilengen waqıt ishinde tóreshiler quramına jańa tuwılǵan balanı qundaqlap kórsetiwi kerek, sonday–aq, bul shártte, balanı jórgekke oraw tártibi, tazalıǵı, jas nárestege degen súyishpenshiligine, sheberligine hám óz waqtında orınlawına ayrıqsha itibar qaratıladı.
Úshinshi shárt bilimli qızlar – jámiyet baxtı atamasındaǵı soraw-juwap shárti bolıp, bul shártte qatnasıwshılarǵa aldın ala tayarlanǵan sorawlar konvertke salıp tarqatıladı. Hár bir konvertte 2 sorawdan boladı. Sorawlarda student-qızlardıń medicinalıq mádeniyatı hám de kúndelikli turmısqa, shańaraqqa baylanıslı boladı. Bunda qatnasıwshılardıń turmısta, shańaraqta ushırasatuǵın hár qıylı jaǵdaylardan óziniń ádepli, mádeniyatlı sózi, házir juwaplılıǵı menen shıǵıp kete alıw sheberligi sınaladı.
Tórtinshi shárt dasturxan stolın jasaw shárti bolıp, bul shártte qatnasıwshılar dasturxan stolın jasaw, awqatlanıw ıdısların belgili bir tártipte jaylastırıwdı, sonıń menen birge onı bezewdi óz ishine aladı. Bul shárt qatnasıwshılardıń atqarıw sheberligine qaray bahalanadı.
Tańlaw barısında qurılıs fakulteti student-qızları injenerlik kommunikaciyalar qurılısı hám montajı bakalavr baǵdarı 2-kurs studenti Qadirbergenova Dilshoda 1-orındı, qurılıs materialları hám buyımları 1-kurs studenti Tengelova Surayo 2-orındı, injenerlik kommunikaciyalar qurılısı hám montajı 1-kurs studenti Isamaylova Dilfuza hám injenerlik kommunikaciyalar qurılısı hám montajı 2-kurs studenti Bazarbaeva Gulshad 3-orındı alıwǵa miyassar boldı hám sıylı diplom hám sawǵalar menen sıylıqlandı.
Qurılıs fakulteti hayal-qızlar máseleleri
boyınsha dekan máslátshisi R.Paxratdinova
