Ózbekstan Milliy universiteti professorı Baxrom Omirov Berdaq atındaǵı Qaraqalpaq mámleketlik universiteti Matematika fakultetiniń studentleri hám magistrantlarına zamanagóy algebranıń áhmiyetli máseleleri boyınsha lekciya sabaǵın ótti. B.Omirov hár jılı Matematika fakulteti jas professor-oqıtıwshıları, student-jasları hám magistrantlarına ilimiy seminar shólkemlestirip, óz bilimleri hám ilimiy másláhátlerin bólisip kelmekte.
Professor B.Omirovtıń ilimiy iskerligi dawamında 200 den aslam ilimiy miynetleri baspadan shıqqan bolsa, olardan 100 ge jaqını shet eldiń belgili ilimiy jurnallarında baspadan shıqqan. B.Omirov Franciya, Italiya, Germaniya, Ispaniya, Turkiya, BAÁ, Qubla Koreya, Hindistan, Qıtay, Malayziya, Pakistan, Meksika, Braziliya hám AQSh mámleketlerinde ilimiy saparlarda bolǵan, sonıń menen birge, 2008-2013-jıllarda Dúnya júzlik ilimler akademiyasınıń (TWAS – The World Academy of Sciences) jas alımlar sekciyasınıń aǵzası bolıp saylanǵan, al 2022-jıl 1-yanvardan baslap usı akademiyanıń rawajlanıp atırǵan mámleketlerde ilim-pándi rawajlandırıw boyınsha aǵzası sıpatında saylanǵan.
Sonday-aq, 2017-jılda “Web of Science” maǵlıwmatlar bazasında eń kóp silteme qılınǵan maqalalar avtorı, 2018-jılda bolsa “Scopus” maǵlıwmatlar bazasındaǵı jurnallarda tábiyiy pánler boyınsha joqarı reytingke iye izertlewshi sıylıqları menen sıylıqlanǵan. B.Omirov akademik Sh.Ayupov, professorlar W.Roziqov, K.Kudaybergenovlar menen birgelikte Ózbekstan Respublikası Prezidenti Pármanı menen Ózbekstan Respublikası Ilim hám Texnika tarawındaǵı I dárejeli Mámleketlik sıylıǵı menen sıylıqlanǵan.
Funkcionallıq analiz, algebra hám geometriya kafedrası baslıǵı T.Kurbanbaev
