Húrmetli Prezidentimizdiń sport tarawına degen joqarı itibarı, tarawdıń materiallıq-texnikalıq bazasın bekkemlew, olardı hár tárepleme qollap-quwatlawdı kúsheytiw maqsetinde alıp barılıp atırǵan reformaları, álbette, tarawdıń rawajlanıwına, ásirese student jaslarımızǵa keń múmkinshilik jaratpaqta. Usı tiykarda búgin student-jaslarǵa sport penen shuǵıllanıw ushın múnásip shárayat jaratıw maqsetinde Berdaq atındaǵı Qaraqalpaq mámleketlik universiteti sport sarayı janınan byudjetten tısqarı qarjıları esabınan ashıq basketbol hám voleybol sport maydanshaları qurılıp, paydalanıwǵa tapsırıldı. Ashılıw máresiminde Qaraqalpaqstan Respublikası Ministrler Keńesi Baslıǵınıń orınbasarı A.Daniyarov, Ózbekstan Respublikası Joqarı bilimlendiriw, ilim hám innovaciyalar ministrligi Qaraqalpaqstan aymaqlıq basqarmasınıń baslıǵı N.Kayupov universitetimiz rektorı A.Reymov, barlıq prorektorlar, fakultet dekanları hám student-jaslar qatnastı.
Dáslep, Qaraqalpaqstan Respublikası Ministrler Keńesi Baslıǵınıń orınbasarı A.Daniyarov sózge shıǵıp, bársheni búgingi paydalanıwǵa tapsırılıp atırǵan sport maydanshasınıń ashılıwı menen qızǵın qutlıqladı. Bunnan soń, universitet rektorı A.Reymov sózge shıǵıp Húrmetli Prezidentimiz baslaması menen mámleketimizde jas áwladtıń fizikalıq hám ruwxıy jaqtan salamat bolıp ósiwi, sonıń menen birge olardıń bos waqıtların mazmunlı shólkemlestiriw hám jaslardı ǵalabalıq sportqa keńnen qamtıw boyınsha bir qatar reformalar ámelge asırılıp, atırǵanlıǵın aytıp ótti. Sonday-aq, Bunday jaratılǵan imkaniyatlardan universitetimiz student-jasları aqılǵa muwapıq paydalanıp, Jáhán hám Aziya chempionları jetilisip shıǵıp atırǵanlıǵı, bul jańadan paydalanıwǵa tapsırılıp atırǵan ashıq sport maydanshası student-jaslar arasında salamat turmıs tárizin qáliplestiriw, olardıń óz-ara doslıǵın bekkemlew, universitet kóleminde bul sport túrlerin rawajlandırıw hám keleshekte elimizge belgili sportshı bolıp jetilsip shıǵadı dep bekkem isenim bildirdi.
Maǵlıwmat ushın bul sport maydanshanı qurıwda kesip alıwshı qurılıs mákemesi «ASAD-ShOX QURILIS» JShJ ti tárepinen tender bahası 2 334 602 137, 00 sumǵa kapital ońlaw qurılıs jumısları alıp barılıldı.
QMU baspasóz xızmeti
