Elimizde jas áwladtıń fizikalıq hám ruwxıy jaqtan salamat bolıp ósiwi, sonıń menen birge olardıń bos waqıtların mazmunlı shólkemlestiriw hám de jaslardı ǵalabalıq sportqa keńnen qamtıw boyınsha bir qatar reformalar ámelge asırılmaqta. Ózbekstan Respublikası Prezidentiniń “Kurash milliy sport túrin rawajlandırıw hám onıń xalıqaralıq mártebesin jáne de asırıw is-ilajları haqqında”ǵı PQ-4881-sanlı qararınıń orınlanıwın támiyinlew maqsetinde, sonday-aq, 9-may – «Eslew hám qádirlew kúni» múnásibeti menen usı jıldıń 11-may kúni Nókis qalasında jaylasqan «Kurash orayı» sport zalında eresekler hám qızlar arasında Dene mádeniyatı fakulteti tárepinen sporttıń milliy kurash túri boyınsha “Qaraqalpaq mámleketlik universiteti Rektorı ashıq kubogi” ótkerildi.
Jarıs eresekler arasında 66,73,81,+81 kg salmaq kategoriyalarında, al qızlar arasında bolsa 57,+57 kg salmaq kategoriyaları boyınsha shólkemlestirilip, oǵan Qaraqalpaqstan Respublikası hám Xorezm wálayatınan jámi 100 den aslam palwanlar qatnastı. Jarıs qızǵın bellesiwlerge bay bolıp, xalıqaralıq «Kurash» qaǵıydalarına muwapıq alıp barıldı. Tájiriybeli tóreshiler tárepinen ádil bahalandı hám eresekler arasındaǵı hám de qızlar arasındaǵı jeńimpaz bolǵan palwanlar anıqlandı. I, II, III-orınlardı iyelegen palwanlar Qaraqalpaq mámleketlik universiteti sport klubı tárepinen tayarlanǵan diplomlar hám qımbat bahalı sawǵalar menen sıylıqlandı. Ótkerilgen jarıstıń tiykarǵı maqseti student-jaslar arasında salamat turmıs tárizin qáliplestiriw, sporttıń milliy kurash túrin jáne de rawajlandırıw hám en jaydırıw, jaslardıń kurash sport túrine bolǵan qızıǵıwshılıqların arttırıw, olardıń sport sheberligin asırıw, qábiletli sportshılardı anıqlaw bolıp tabıladı.
R.Óteniyazov
Dene mádeniyatı fakultetiniń
jaslar menen islesiw boyınsha dekan orınbasarı
