Universitetimizdiń professorı, belgili ilimpaz, filologiya ilimleriniń doktorı Shamshetdin Abdinazimov gezektegi xalıq aralıq ilimiy-teoriyalıq konferenciyada mirátnama tiykarında qatnaspaqta. Usı jıldıń 20-may kúni Alisher Nawayı atındaǵı Tashkent mámleketlik ózbek tili hám ádebiyatı universitetinde “Ózbek folklorı hám dialektleri izertlewleri: ámeliyat, metodologiya, jańasha qatnas” atamasındaǵı xalıq aralıq ilimiy-teoriyalıq konferenciya bolıp ótti.

Konferenciyanıń plenarlıq májilisinde professor Sh.Abdinazimov “Qaraqalpaq til biliminde lingvofolkloristikalıq izertlewler hám olardıń baǵdarları” atamasında bayanat jasadı. Bul bayanatta avtor tárepinen qaraqalpaq til biliminde jańadan qáliplestirilgen, maqseti folklorlıq shıǵarmalardıń tilin arnawlı izertlew bolǵan – lingvofolkloristika tarawı haqqında, onıń ulıwma til biliminde hám qaraqalpaq til bilimindegi izertleniwi, sonıń menen birge, aldaǵı orınlanıwı zárúr máseleler sóz etildi.

Qaraqalpaqlar – xalıq awızeki dóretpelerine júdá bay xalıq. Usı awızeki xalıq dóretpeleriniń tilin arnawlı izertleytuǵın til biliminiń tarawı – “lingvofolkloristika” dep atalıp, bul termindi qaraqalpaq til bilimine Sh.Abdinazimov alıp kirdi. Ol 1992-jılı “Qırıq qız” dástanınıń sózlik quramı” degen temada kandidatlıq dissertaciya qorǵap, qaraqalpaq til biliminde folklorlıq dóretpelerdiń tilin arnawlı izertlegen birinshi ilimpaz boldı. Ustaz tiykar salǵan taraw boyınsha onıń ilimiy basshılıǵı astında birneshe shákirtleri kandidatlıq, filosofiya doktorı dissertaciyaların jaqlap shıqtı.

Atap ótiw kerek, usı jıldıń 28-aprel kúni professor Sh.Abdinazimov Qazaqstan Akademiyasında bolıp ótken xalıq aralıq ilimiy konferenciyaǵa qatnasıp, bayanat jasaǵan edi.