Usı jıldıń 22-26-may kúnleri Tashkent hám Nókis qalalarında Global topıraq sherikligi (GSP), (EASP) hám BMSH Azıq-awqat hám awıl xojalıǵı shólkemi (FAO)niń Ózbekstandaǵı wákillikli bólimi Ózbekstan Respublikası Awıl xojalıǵı ministrligi, sonday-aq, bir qatar milliy sherikler menen birgelikte Shorlanǵan topıraqlar xalıqaralıq tarmaǵı (INSAS)nıń ekinshi májilisi bolıp ótpekte.
Xalıqaralıq forumda Avstraliya, Armeniya, BAÁ, Bangladesh, Gruziya, Ispaniya, Italiya, Malayziya, Mısr, Niderlandiya, Pakistan, Senegal, Tanziya, Franciya, Qıtay, Oraylıq Aziya mámleketleri sıyaqlı 30 dan aslam mámleketlerden ekspertler qatnaspaqta. Qatnasıwshılar qatarında Qaraqalpaq mámleketlik universiteti Tábiyiy geografiya hám gidrometeorologiya kafedrasınıń professorı Sultasheva Oralxan Genjebaevna da bar bolıp, forum sheńberinde Evraziya topıraq sherikliginiń altınshı májilisi hám shorlanǵan topıraqlardı analizlew boyınsha Global topıraq laboratoriyaları tarmaǵınıń treningi de bolıp ótiwi kózde tutılǵan. Ilaj baǵdarlamasına shorlanǵan topıraqlar boyınsha seminar, INSAS isshi toparlarınıń texnikalıq májilisleri hám topıraqlardıń shorlanıwına qarsı gúresiw boyınsha treningler kirgizilgen, sonday-aq, qatnasıwshılardıń Aral teńiziniń qurǵaǵan ultanına sayaxatı da kútilmekte.
