Usı jıldın 25-may kúni Berdaq atındaǵı Qaraqalpaq mámleketlik universiteti Dene mádeniyatı fakulteti 1-kurs studenti Gúlistan Perdebaevanıń sport tarawındaǵı jetiskenligi haqqında tayarlanǵan «Qılısh párwazı» hújjetli filminiń premyerası bolıp ótti. Onda universitet professor-oqıtıwshılıarı, student-jaslar, filmniń scenariy avtorı, rejissyorı hám bas qaharmanınıń sporttaǵı ustazları ata-anaları qatnastı. Ilajdı Dene mádeniyatı fakulteti dekanı N.Kaypov ashıp berdi hám basqarıp bardı. Bunnan soń, «Qılısh párwazı» hújjetli filmi jıynalǵanlar názerine usınılıp, filim bas qaharmanı, scenariy avtorı, rejissyorı hám qaharmanımızdıń uztazları menen sáwbet bolıp ótti.
Haqıyqatında da Húrmetli Prezidentimiz baslaması menen mámleketimizde jas áwladtıń fizikalıq hám ruwxıy jaqtan salamat bolıp ósiwi, sonıń menen birge olardıń bos waqıtların mazmunlı shólkemlestiriw hám jaslardı ǵalabalıq sportqa keńnen qamtıw boyınsha bir qatar reformalar ámelge asırılmaqta. Sonlıqtan da Húrmetli Prezidentimiz sport tarawına degen joqarı itibarı, tarawdıń materiallıq-texnikalıq bazasın bekkemlew, olardı hár tárepleme qollap-quwatlawdı kúsheytiw maqsetinde alıp barılıp atırǵan reformaları, álbette, tarawdıń rawajlanıwına, ásirese student jaslarımızǵa keń múmkinshilik jaratpaqta. Bunday jaratılǵan imkaniyatlardan universitetimiz student-jasları aqılǵa muwapıq paydalanıp, solardan 1 Olimpiada qatnasıwshısı, 4 Jáhán chempionı, 10nan aslam Aziya chempionı, 130dan aslam Ózbekstan chempionı jetilisip shıqtı.
Bunın ayqın mısalı retinde universitetimizdiń Dene mádeniyatı fakulteti 1-kurs studenti Gúlistan Perdebaevanıń sporttaǵı jetiskenliklerin aytıw orınlı. Ol 2022-jılı Aziya chempionatınıń 2 «Altın», 1 «Gúmis» medalın jeńip aldı. Usı jılı 9-mart kúni Tashkent qalasında ótkerilgen Aziya chempionatında taǵı bir 1 «Altın» medal jeńip aldı. Kúni keshe 22-23-may kúni hayal-qızlar arasında ótkerilgen Ózbekstan chempionatında «Gúmis» hám «Bronza» medalı jeńimpazı boldı. Sonday-aq, qızımız jas óspirimler hám jaslar arasında kóp márte Ózbekstan chempionı, bir neshe márte Jáhán kubogı, xalıqaralıq turnirler jeńimpazı bolǵan, Jáhán chempionatlarına qatnasqan. Usı miynetleri ushın Qaraqalpaqstan Respublikası Joqarǵı Keńesi tárepinen «Úmit ushqını» kókirek belgisi menen sıylıqlandı. Ushırasıw dawamında filim qaharmanı universitetimiz maqtanıshı Dene mádeniyatı fakulteti 1-kurs studenti Gúlistan Perdebaevanıń ata-anasına universitetimiz rektoratı tárepinen alǵısnama hám húrmet jarlıqları tapsırıldı.
