Elimizde jaslarǵa degen itibar mámleketlik siyasat dárejesine kóterilgen bolıp, olardıń jaqsı bilim alıwı, zamanagóy kásiplerdi iyelewi, jetik kadrlar bolıp jetilisiwi ushın shárt-sharayatlar jaratılǵan. Olardıń bos waqıtların mazmunlı ótkeriw boyınsha kóp ǵana ilajlar ótkerilmekte. Sol qatarı, Shet tilleri fakulteti studentleri tárepinen universitetimiz kóleminde birinshi márte student-jaslardı bir jerge jámlegen “Bir úydiń balaları” atamasında “Open air party” ilajı shólkemlestirildi.
Ashıq aspan astındaǵı bayram keshesi universitettiń jasıl qaplamalı futbol maydanshasında bolıp ótti hám ilajdı Shet tilleri fakulteti dekanı Djavod Kurbanbaev ashıp berdi. Ilajda Shet tilleri fakulteti oqıtıwshıları, tyutorlar jámááti hám barlıq fakultetlerden jámlengen studentler qatnasıp, waqtın kewilli ótkerdi. Ashıq hawada, qızıqlı koncert baǵdarlamasın jasıl qaplama ústine tamashalaw, shólkemlestiriwshiler tárepinen tayarlanǵan qızıqlı oyınlarǵa qatnasıw, jaslarǵa kewilli keypiyat baǵıshladı. Keshe óziniń tákirarlanbas atmosferası menen ayrıqshalanıp turdı, student-jaslar shólkemlestiriwshiler tárepinen tayarlanǵan ayaq oyınların tamashalaw menen bir qatarda gitarada janlı hawazda birgelikte qosıqlar atqarıldı. Ilaj dawamında jaslarǵa say oyın-zawıqlar, túrli viktorinalar hám kreativ sport oyınları da shólkemlestirildi. Bir tárepte studentler qosıq namaları menen karaoke aytqan bolsa, ekinshi tárepte kreativ sport oyınları shólkemlestirildi. Qaraqalpaqsha milliy ayaq oyınına tamashagóyler de qosılıp oynadı, rus hám inglis tillerindegi namalı qosıqlardı zawıq penen tıńladı, kúlki hám qızıǵıwshılıq oyatqan kreativ oyınlarǵa student-jaslar belsene qatnasıp, ózgeshe tásirlerge iye boldı. Shet tilleri fakulteti oqıtıwshıları hám tyutorları ortasında “Retro qosıqlar” atamasında qosıq atı hám atqarıwshıların tabıw shárti qoyılǵan viktorina da júdá kóterińki ruwxta ótkerildi. Shólkemlestiriwshiler hám qatnasıwshılar menen birgelikte Ana Watan, muhabbat, doslıqtı jırlawshı namalı qosıqlar aytıldı.
Bul ilajdı shólkemlestiriwden maqset bir tárepten jaslardıń bos waqtın mazmunlı ótkeriw bolsa, ekinshi tárepten xalıqlar doslıǵın jırlaw, jaslarda motivaciyalıq sezimlerdi beriwden ibarat.
Shet tilleri fakulteti tyutori Rinat Kalmenov
