Shet tilleri fakulteti Inglis tili bilimi kafedrası tárepinen 2022-2023 oqıw jılı juwmaǵı boyınsha «Year-end party» atamasında ilaj shólkemlestirildi. Ilajǵa professor-oqıtıwshılar hám de student-jaslar belsene qatnastı. Kesheni shet tilleri fakulteti dekanı Dj.Kurbanbaev ashıp berip, jıl juwmaǵındaǵı jetiskenliklerine ayrıqsha toqtalıp ótip, kafedra jámáátiniń, filologiya hám tillerdi oqıtıw (inglis tili) tálim baǵdarı student-jaslarınıń jıl dawamında barlıq tarawlarda, ilim-pán, sport, volontyorlıq jumıslarda da úzliksiz qatnasıp, belsendilik kórsetip kiyatırǵanlıǵın atap ótti hám kesheni ashıq dep jariyaladı. Ilaj dawamında student-jaslar tárepinen tayarlanǵan ayaq-oyınlar hám qosıqlar menen keshe eleda janlandı, asirese ádebiy shıǵarmalar tiykarında inglis, yapon, koreys tillerinde shólkemlestirilgen saxnalıq kórinisler ayrıqsha kewil keypiyat baǵıshladı.
Búgingi kúnde Respublikamızda shet tillerin oqıtıw hám úyreniw mámleketlik siyasat dárejesinde hám dáwir talabı. Bunıń áhimiyetin túsingen, ásirese ingliz tilin xalıqaralıq til sıpatında úyrenip atırǵan jaslar sanı kúnnen kúnge aspaqta. Sol qatarı filologiya hám tillerdi oqıtiw (inglis tili) tálim baǵdarı student-jaslarıda til biliw dárejesin anıqlawshı Multilevel hámde IELTS sıyaqlı milliy hám xalıq aralıq sertifikatlarǵa iye studentlerimiz kópshilikti quraydı. Mine usınday xalıqaralıq hám milliy sertifikatlardan keminde C1 dárejesin qolǵa kirgizgen studentlerdi motivaciyalaw, basqada student-jaslarǵa joqarıdaǵıday sertifikatqa iye bolıwına iytermelew maqsetinde ilaj juwmaǵında Universiteti rektorı A.Reymov hám shet tilleri fakulteti dekanı Dj.Qurbanbaev tárepinen sertifikat penen sıylıqlandı.
Bunnan tısqarı jıl dawamında hár bir tarawda belsendilik kórsetip kiyatırǵan professor-oqıtıwshılar hám student jaslarda sertifikat penen sıylıqlandı. Jaslar jámiyet keleshegi hámde erteńgi kúnimizdiń tiykarın salıwshılar. Al usınday xoshametlew hám ilajlardıń shólkemlestiriliwi bolsa student-jaslarǵa úlken motivaciya hám isenim boladı. Biz studentlerimizdiń elede joqarı nátiyjelerge erisiwine isenim bildiremiz.
Sarbinaz Berdimuratova Inglis til bilimi kafedrası assistenti
