Berdaq atındaǵı Qaraqalpaq mámleketlik universiteti Yuridika fakulteti, Milliy ideya, ruwxıylıq tiykarları hám huqıq tálimi kafedrasında «Ullı Beruniy miyrası hám insaniyat rawajlanıwı» atamasında xalıqaralıq ilimiy-ámeliy konferenciya bolıp ótti. Onda professor-oqıtıwshılar, sırt el ilimpazlar, jas ilimpazlar, tayansh doktorantlar, magistrantlar hám student-jaslar qatnastı.
Konferenciyanıń tiykarǵı maqseti Abu Rayxan Beruniy dóretpeleri hám de dúńya júzilik jańa ashılıwları menen jáhán ilimi, mádeniyatı rawajlanıwına úlken úles qosqan ullı oyshıl alım, dáslepki Renessans dáwiriniń wákili Abu Rayxan Beruniydiń ilimiy-bilimlendiriw miyrasların jáne de tereń úyreniw hám keń úgit-násiyatlaw, bul tarawda izertlewler alıp barıp atırǵan alım, doktorant, magistrant hám qánigelerdiń ilimiy-izertlew jumıslarınıń sapası hám nátiyjeliligin asırıw bolıp tabıladı.
Konferenciyada xalıqaralıq izertlewshilerdiń tájiriybeleri úyrenilip talıqlanadı. Sonday-aq konferenciyanıń aldına qoyǵan maqseti Abu Rayxan Beruniy miyrasların úyreniw maqsetinde xalıqaralıq kólemde keń kólemli ilimiy izertlewler alıp barıw hám olardıń nátiyjelerin járiyalaw, sol temada ilimiy, kórkem-publistik dóretpeler jaratıw, sırt el ilimpazlardıń dóretpelerin ózbek hám qaraqalpaq tillerine awdarmalaw boyınsha máseleler hám olardıń sheshimleri boyınsha juwmaq hám usınıslar tayarlawdan ibarat.
Sonıń menen birge, konferenciya dawamında Abu Rayxan Beruniydiń shıǵarmaları hám oylap tabıwları menen jáhán ilim hám mádeniyatına qosqan úlesi, Abu Rayxan Beruniydiń ilimiy aǵartıwshılıq miyrasın jáne de tereń úyreniw, milliy qádiriyatlar, ádebiy miyraslar hám mádeniy-ruwxıy dástúrlerdiń búgingi milliy rawajlanıwdaǵı áhmiyeti, turizm hám mádeniy miyras obyektlerin asırap abaylaw hám globallasıw hám dúnya integraciyası shárayatında milliy mádeniy miyraslardıń ruwxıy ideyalıq áhmiyetleri haqqında aytıp ótildi.
Konferenciya shólkemlestiriwshileri tárepinen bul temada ilimiy jumıs menen shuǵıllanıwǵa tiyisli qatar wazıypalar, usılar qatarında milliy hám sırt el jurnallarda ilimiy maqalalar járiyalaw, respublika hám xalıqaralıq konferenciyalarda tezislerdi tayarlaw, tiyisli tártipte rásmiylestiriw hám de baspadan shıǵarıw, ilimiy hám innovciyalıq iskerlik boyınsha tańlawlar, olarda qatnasıw tártibi hám de shártleri haqqında keń túrde maǵlıwmatlar berildi.
Konferenciya juwmaǵında jas izertlewshilerdiń ózleri qızıqtırǵan sorawlarǵa ilaj shólkemlestiriwshileri tárepinen tiyisli juwaplar berildi. Konferenciya joqarı dárejede ótkerildi.
“Milliy ideya, ruwxıylıq tiykarları
hám huqıq tálimi” kafedrası dotsenti
I.B. Jollibekova
