“Insan salamat ortalıqta jasawı ushın ózi de salamat bolıwı kerek”. Dúnyada hátte pulǵa da satıp alıp bolmaytuǵın nárse – densawlıq. Demek, salamat turmız tárizinde jasaw biz ushın teńi tayı joq baxıt. Qaraqalpaq mámleketlik universiteti professor-oqıtıwshıları ushın “Qaraqalpaqstandaǵı densawlıqtı saqlaw mákemeleri hám mekteplerde ıqlımǵa shıdamlı baslanǵısh medicinalıq-sanitariya járdemi sisteması, adamlarǵa baǵdarlanǵan suw, sanitariya hám de gigiena ámeliyatı ushın tiykar jaratıw” atamasındaǵı joybardıń náwbettegi oqıw kursı juwmaqlandı. UNFPA joybarı tiykarında “Jaslardıń reproduktiv salamatlıǵı, jaslarǵa qolaylı xızmet kórsetiw standartların en jaydırıw” temasındaǵı 40 saatlıq seminarda 25 qatnasıwshı tájiriybeli qánigelerden salamat turmıs tárizi, gigiena qaǵıydaları, erte neke hám de erte hámiledarlıq, jınısıy tárbiya, zıyanlı ádetler profilaktikası, kesellikler boyınsha arnawlı metodlar járdeminde bilimlerge iye boldı. Ásirese, “Insert”, “Brainstorming”, “Karta” kibi pedagogikalıq texnologiyalar professor-oqıtıwshılardıń informaciyalardı tez, anıq este saqlap qalıwına járdem berdi.

5 kún kózdi ashıp-jumǵansha ótti-ketti, – deydi Qaraqalpaq ádebiyatı kafedrası docenti Inabat Allambergenova. – Bilim-kónlikpeler arnawlı metodikalar menen puqta islengen. Mentor, speakerler de qızıqlı tárizde temalardı túsindirdi, feedbackler berildi. Toparlar bolıp, berilgen temalar boyınsha 40 minutlıq sabaq ta ótip berdik. Úyrengenlerimde studentlerge, doslarıma, tanıs-bilislerime úyretiwge háreket etemen. Sebebi, biz de jámiyetti salamat qılıw ushın at salısıwımız lazım dep esaplayman. Seminar dawamında professor-oqıtıwshılar óz pikirlerin erkin bildirdi, ayırım temalar boyınsha diskussiyaǵa da kiristi. Erte neke, erte hámiledarlıq boyınsha keysler aytılıp, pikir-usınıslar tıńlandı. Speaker Natalya Pirniyazova qatnasıwshılarǵa tapsırmalar berip, temalardı jetkeriw texnologiyaların túsindirdi. Trening juwmaǵında joybar kordinatorı, shólkemlestiriwshileri tárepinen professor-oqıtıwshılarǵa sertifikatlar tapsırıldı.