Búgin 23-iyun kúni Berdaq atındaǵı Qaraqalpaq mámleketlik universitetinde Ózbekstan Respublikası Joqarı bilimlendiriw, ilim hám innovaciyalar ministri orınbasarı Komiljon Karimovtıń basshılıǵında Joqarı oqıw orınlarınıń professor-oqıtıwshıları menen ushırasıw bolıp ótti. Onda Qaraqalpaq mámleketlik universiteti, Qaraqalpaqstan awıl xojalıǵı hám agrotexnologiyalar institutı, Qaraqalpaqstan medicina institutı, Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı, Ózbekstan mámleketlik dene tárbiyası hám sport universiteti Nókis filialı professor-oqıtıwshıları qatnastı.
Ushırasıwda dáslep, Joqarı bilimlendiriw, ilim hám innovaciyalar ministri orınbasarı Komiljon Karimov sózge shıǵıp, búgingi kúnde mámleketimizde bilimlendiriw tarawın rawajlandırıw, jańa reformalardı ámelge asırıw mámleket siyasatınıń baslı baǵdarlarınan biri ekenligi, sonday-aq, bilimlendiriw sistemasınıń jaqsılaw onı zaman talapları tiykarında modernizaciyalaw, jaslardı joqarı bilimli, fizikalıq hám ruwxıy bay insan etip tárbiyalaw, bilimlendiriw mákemeleriniń basshı hám pedagog xızmetkerleriniń abıroyın asırıw, olardıń nátiyjeli miynet etiwi ushın zárúr shártsharayatlar jaratıw boyınsha bir qatar jumıslar alıp barılıp atırǵanlıǵın, biraq sonday imkaniyatlar jaratılǵanlıǵına qaramastan, ayrım joqarı oqıw orınlarında kemshilikler bar ekenligin aytıp ótti. Sonıń menen bir qatarda professor-oqıtıwshılar óz pikir usınısların bildirip, ushırasıw soraw juwaplar menen dawam etti.
Bunnan soń, Joqarı bilimlendiriw, ilim hám innovaciyalar ministri orınbasarı K.Karimov, universitetimiz Oqıw isleri boyınsha prorektorı O.Duysenbaev, Qarjı hám ekonomika isleri boyınsha prorektorı A.Qudaybergenovlar birgelikte Húrmetli Prezidentimizdiń 2023-jıl 16-fevral kúngi “2023 jılda qayta tikleniwshi energiya dereklerin hám energiya únemlewshi texnologiyalardı engiziwdi jedellestiriw is-ilajları haqqında”ǵı PQ-57-sanlı qararı tiykarında Qaraqalpaq mámleketlik universitetinde qayta tikleniwshi energiya derekleri bolǵan quyash panelleri ornatılǵanlıǵın kózden ótkerdi. Bul jerde Joqarı bilimlendiriw, ilim hám innovaciyalar ministrligi tárepinen 2023-jılda tastıyıqlanǵan rejesine muwapıq universitettiń 21 imaratında 10107,6 kv.m maydanına quwatlıǵı 880 kVt bolǵan quyash fotoelektrik stanciyaların ornatıw boyınsha jámi 9 680 000 000 som pul qarjıları ajıratılǵanlıǵın búgingi kúnge kelip quyash panellerin ornatıw jumısları juwmaqlanıw aldında turǵanlıǵı boyınsha maǵlıwmatlar berildi.
QMU Baspasóz xızmeti
