Xabarıńız bar, respublikamızdıń barlıq joqarı oqıw orınları studentleri arasında ótkerilgen «Universiada-2022» sport jarıslarınıń respublikalıq final basqıshında Qaraqalpaqstan Respublikası saylandı komandası ulıwma komandalıq esapta 3-orındı iyelegen edi. Onda Berdaq atındaǵı Qaraqalpaq mámleketlik universiteti student-jaslarıda óz belsendiligin kórsetti.

Búgin 5-iyul kúni Berdaq atındaǵı Qaraqalpaq mámleketlik universiteti ashıq sport maydanshasında «Universiada-2022» sport jarıslarınıń jeńimpazları hám olardıń trenerleri, sıylıqlaw máresimi bolıp ótti. Ilajda universitet rektorı A.Reymov sózge shıǵıp, Húrmetli Prezidentimiz baslaması menen mámleketimizde jas áwladtıń fizikalıq hám ruwxıy jaqtan salamat bolıp ósiwi, sonıń menen birge olardıń bos waqıtların mazmunlı shólkemlestiriw hám jaslardı ǵalabalıq sportqa keńnen qamtıw boyınsha ámelge asırılıp atırǵan jumıslar haqqında aytıp, bárshe student-jaslardı hám olardıń trenerlerin qolǵa kirgizgen jetiskenlikleri menen qızǵın qutlıqlap, diplom hám estelik sawǵaların tapsırdı.

Bunnan soń, ilaj sheńberinde Ózbekstan Respublikası Prezidenti saylawı aldınan ÓzLiDeP Qaraqalpaqstan Respublikalıq Keńesi hám Berdaq atındaǵı Qaraqalpaq mámleketlik universiteti menen birgelikte úgit-násiyat ilajları bolıp ótti. ilajda O’zLiDeP  Qaraqalpaqstan Respublikalıq Keńesi baslıǵınıń  birinshi orınbasarı – apparat baslıǵı K.Artıkov, O’zLiDeP aǵzası Qaraqalpaqstan Respublikası Joqarǵı Kenesi deputatı, Berdaq atındaǵı Qaraqalpaq mámleketlik universiteti rektorı A.Reymov qatnasıp, keń jámiyetshilik wákillerine usı jıl 9-iyul kúni ótkeriliwi rejelestirilgen áhmiyetli siyasiy process – Ózbekstan Respublikası Prezidenti saylawı hám partiyadan Prezidentlikke talaban Sh.Mirziyoevtiń saylawaldı baǵdarlamasınan orın alǵan áhmiyetli strategiyalıq baǵdarlardıń mazmun-mánisin túsindiriw jumısların alıp bardı. Ilaj universitet student-jasları tárepinen tayarlanǵan koncert baǵdarlaması menen dawam etti.

QMU baspasóz xızmeti