Búgingi kúnde Berdaq atındaǵı Qaraqalpaq mámleketlik universiteti mámleketimiz hám sırt ellerdegi joqarı orınları hám ilimiy izertlew mákemeleri qatarında sırt ellerdiń abıroylı kompaniyaları menen birge islesiw baylanıslarına da iye bolǵan regiondaǵı jetekshi joqarı oqıw ornı esaplanadı. Bunıń ayqın mısal retinde Universitet hám Qubla Koreyanıń “Younginsn SO LTD” kompaniyası ortasındaǵı óz-ara birge islesiw haqqında memorandum dúzilgenligin atap ótiwimiz múmkin.

Mine usı memorandum tiykarında hám ilimiy hám innovaciyalıq iskerlik baǵdarında óz-ara baylanıslardı elede bekkemlew ushın 12-iyun kuni Universitet rektorı A.Reymov hám usı kompaniyanıń Prezidenti CHoy Sek Xoan penen óz-ara rásmiy ushırasıw ilajı bolıp ótti.
Ushırasıw barısında universitet hám kompaniya ortasındaǵı tálim, ilim hám islep shıǵarıw integraciyasına baǵdarlanǵan aldaǵı waqıttaǵı birge islesiw boyınsha qatar kelisimlerge erisildi. Sonıń ishinde, universitette kelesi waqıtta azıq-awqat qáwipsizligin támiyinlew boyınsha óz aldına arnawlı laboratoriya ásbap-úskeneleri hám basqa da qurılmalardı ornatıw, kompaniya wákilleri tárepinen universitette tikkeley usı baǵdarda ilimiy-ámeliy jaqtan óz-ara izertlewler alıp barıw boyınsha birgelikte ámeliy jumıslardı alıp barıw rejelestirilmekte.

Ushırasıw ilajı barısında universitet hám usı jetekshi kompaniya basshıları menen mine usı perspektivalıq jumıslardı ámelge asırıwda birge islesiw haqqında óz-ara shártnamalarǵa qol qoyılıp, bul sıyaqlı ilajlardı aldaǵı waqıtta da birgelikte alıp barıw boyınsha jumıslar belgilep alındı. Ushırasıw ilajı joqarı shólkemleskenlik dárejede hám nátiyjeli túrde ótkerildi.