Búgin, 4-sentabr kúni respublikamız boylap barlıq bilimlendiriw mákemelerinde jańa oqıw jılı baslanbaqta. Usı tiykarda Berdaq atındaǵı Qaraqalpaq mámleketlik universitetinde jańa 2023/2024 oqıw jılına baǵıshlanǵan ilaj bolıp ótti. Ilajda professor-oqıtıwshılar, ata-analar hám student-jaslar qatnastı. Eń dáslep ilaj Ózbekstan hám Qaraqalpaqstan Respublikalarınıń mámleketlik gimnleri menen baslandı.
Bunnan soń, universitet rektorı A.Reymov sózge shıǵıp, bársheni Ózbekstan Respublikası Ǵárezsizliginiń 32 jıllıq bayramı sonday-aq, 2023/2024 oqıw jılında Berdaq atındaǵı Qaraqalpaq mámleketlik universitetine oqıwǵa qabıllanıp, student bolıw baxıtına miyassar bolǵan student-jaslardı hám olardıń ata-anaların qızǵın qutlıqladı.
Sonıń menen birge, Húrmetli Prezidentimizdiń mámleketimizde bilimlendiriw tarawına bolǵan ayrıqsha itibarı hám jaslarımızǵa berilip atırılǵan imkaniyatlar, universitetimizde student-jaslar ushın jaratılǵan qolaylıqlar haqqında aytıp ótti. Ilaj dawamında universitetimizdiń Nuranıylar keńesi baslıǵı B.Abdikamalov sózge shıǵıp, jámiyetimizde oqıp bilim alaman degen jaslarǵa keń múmkinshilikler jaratılıp berilgenligin aytıp, usınday imkaniyatlardan aqılǵa muwapıq paydalanıp, aldaǵı waqıtları oqıp, tereń bilim alıp, Watanımızdıń rawajlanıwı, jolında ayanbay xızmet etiwde tabıslar tiledi.
QMU baspasóz xızmeti
