Búgin 20-sentyabr kúni Berdaq atındaǵı Qaraqalpaq mámleketlik universitetine 1-kursqa qabıllanǵan studentlerge gúwalıq tapsırıw máresimi bolıp ótti. Ilajǵa universitet professor-oqıtıwshılar, fakultet dekanları, student-jaslar, olardıń ata-anaları hám ǵalaba xabar quralları wákilleri qatnastı. Dáslep ilaj Ózbekstan hám Qaraqalpaqstan Respublikalarınıń mámleketlik gimnleri menen baslandı.
Ilajda universitet rektorı A.Reymov sózge shıǵıp, 2023/2024 oqıw jılında Berdaq atındaǵı Qaraqalpaq mámleketlik universitetine oqıwǵa qabıllanıp, student bolıw baxıtına miyassar bolǵan student-jaslardı hám olardıń ata-anaların qutlıqlap, Húrmetli Prezidentimizdiń 213-sanlı tariyxıy pármanı boyınsha qaraqalpaqstanlı jaslarǵa kórsetip atırǵan atalarsha ǵamxorlıǵı nátiyjesinde mámleketlik grant tiykarında qosımsha 3 mıń kvota, tólemli-kontrakt tiykarında wálayatlardaǵı mámleketlik joqarı oqıw orınlarına 6 mıń 500 kvota ajıratılǵanlıǵın atap ótti. Sonday-aq, jámiyetimizde oqıp bilim alaman degen jaslarǵa keń múmkinshilikler jaratılıp berilip atırılǵanlıǵın, usınday imkaniyatlardan aqılǵa uǵras paydalanıw kerekligin, aldaǵı waqıtları oqıp, tereń bilim alıp, Watanımızdıń rawajlanıwı, jolında ayanbay xızmet etiwde tabıslar tiledi.
Bunnan soń, professor-oqıtıwshılar, studentlerdiń ata-anaları sózge shıǵıp, universitetke oqıwǵa qabıl etilgen studentlerdi búgingi quwanıshlı kúni menen qutlıqlap, aldaǵı oqıwlarında tabıslar tiledi.
Sonıń menen bir qatarda ilajda joqarı ball toplaǵan student-jaslar sózge shıǵıp, búgingi kúnde mámleketimiz tárepinen jaslarǵa berilip atırılǵan imkaniyatlardan sheksiz quwanıshta ekenin aytıp, usınday imkaniyatlardı jaratıp berip atırǵan Húrmetli Prezidentimizge óz minnetdarshılıqların bildirdi. Ilajda joqarı ball toplaplaǵan student-jaslarǵa studentlik gúwalıqları tapsırılıdı hám universitet jámááti tárepinen tayarlanǵan koncert baǵdarlaması menen dawam etti.
Maǵlıwmat ushın; 2023/2024 oqıw jılında Berdaq atındaǵı Qaraqalpaq mámleketlik universitetiniń bakalavriatınıń kúndizgi, sırtqı hám keshki tálim baǵdarlarına jámi 7245 kvota ajıratılıp sonnan 1358 mámleketlik grant, 5887 kvota tálemli kontrakt tiykarında ajıratılǵan bolsa, qosımsha Húrmetli Prezidentimizdiń 213-sanlı Pármanı menen 1209 jas Berdaq atındaǵı Qaraqalpaq mámleketlik universitetine oqıwǵa qabıl etildi.
QMU baspasóz xızmeti
