Búgin Berdaq atındaǵı Qaraqalpaq mámleketlik universitetinde Biologiya fakultetiniń professor-oqıtıwshıları hám Ekologiya tálim baǵdarı student-jasları menen Ekologiya hám qorshaǵan ortalıqtı qorǵaw baǵdarında ámelge asırılǵan jumıslar boyınsha ushırasıw bolıp ótti. Onda Bas prokuraturanıń Ekologiya, qorshaǵan-ortalıqtı qorǵaw hám toǵay xojalıǵı tarawında nızamlardıń orınlanıwı ústinen qadaǵalaw basqarması baslıǵı Uktam Utaev, Qaraqalpaqstan Respublikası Ekologiya hám qorshaǵan ortalıqtı qorǵaw komiteti baslıǵı Maqsud Djumaniyazovlar qatnastı.
Ushırasıwdı universitet rektorı A.Reymov basqarıp bardı. Ol óz sózinde Húrmetli Prezidentimizdiń baslaması menen 2018-jıldıń 27-noyabr kúni BMSh Bas Assambleyasınıń 73-sessiyasında Aralboyı regionı ushın Insan qawipsizligi boyınsha kópsheriklik Trast fondı óz jumısın baslaǵanlıǵın atap ótti. Sonday-aq, Aral teńiziniń qurıǵan túbindegi shóldi toǵaylıqqa aylandırıw boyınsha misli kórilmegen háreketler baslanıp, 2018-jıldan házirgi kúnge shekem 1 mln 700 mıń gektardan aslam maydanda seksewil nálleri egilgenligin aytıp ótti. Bunnan soń, Ekologiya, qorshaǵan ortalıqtı qorǵaw hám toǵay xojalıǵı tarawında nızamlardıń orınlanıwı ústinen qadaǵalaw basqarması baslıǵı Uktam Utaev sózge shıǵıp, Sońǵı jıllarda Aral ekologiyalıq mashqalasına dúnyanıń dıqqatın tartıw, aqıbetlerdi jumsartıw, mashqalaǵa sheshim tabıw Húrmetli Prezidentimizdiń dıqqat itibarında ekenligin Mámleketimiz basshısı 2017-jıl BMSh Bas Assambleyasınıń 72-sessiyasında jáhán jámiyetshiligin Aral mashqalasın sheshiwde kúshlerdi birlestiriwge shaqırǵanlıǵın aytıp ótti. Ushırasıwda professor-oqıtıwshılar, jas alımlar ózleriniń pikir usınısların bildirip, qızıqtırǵan sorawlarına juwaplar aldı.
Ilaj dawamında mimanlar universitetimizdiń student-jasları tárepinen Aral teńiziniń qurıǵan túbinde ámelge asırılǵan jumıslar hám búgingi kúnde alıp barıp atırǵan jańa joybarları menen tanıstı hám universitetimiz átirapına dekorativ terek nállerin otırǵızdı.
QMU baspasóz xızmeti
