Búgin Berdaq atındaǵı Qaraqalpaq mámleketlik universiteti professor-oqıtıwshıları hám student-jasları qatnasıwında ullı oyshıl, alım Abu Rayxan Beruniy babamızdıń 1050 jıllıǵına baǵıshlanǵan ilaj bolıp ótti. Onda Tariyx fakulteti Arxeologiya kafedrası t.i.k. docent J.Aytmuratov, Fizika-matematika ilimi doktorı, professor Q.Ismaylov, Geografiya ilimleri kandidatı, docent K.Allanazarov, Ózbek tili hám ádebiyatı kafedrası docenti M.Sadullaevalar óz bayanatı menen qatnastı.

Ilajdı universitet retorı A.Reymov ashıp berdi hám alıp bardı. Ol óz sózinde ilimiy dóretiwshiligi menen dúnyaǵa tanılǵan enciklopedist alım Abu Rayxan Muhammed Ibn Ahmad al-Beruniydiń ilimiy miyrasların ǵárezsizlik jıllarınan baslap úyreniwge ayrıqsha itibar qaratılǵanlıǵın, onıń astronomiyaǵa, matematikaǵa, geografiya–geodeziyaǵa, filosofiyaǵa, tariyx etnografiya ilimine qosqan úlesleri, ilimiy hám mádeniy miyrasın elede puqta úyreniw, onı jas áwlad jetkeriw tiykarǵa wazıypamız ekenligin aytıp ótti.

Bunnan soń, bayanatshılar, Abu Rayxan Beruniydıń ilmiy hám mádeniy miyrasları, geografiya, fizika hám astronomiya ilmine qosqan úlesleri, sociallıq, filosofiyalıq kóz-qarasları haqqında qatnasıwshılarǵa maglıwmat berip ótti. Ilaj sońında student-jaslar ózleriniń qızıqtırǵan sorawlarına juwaplar aldı.

QMU baspasóz xızmeti