Usı jıldıń 25-26-sentyabr kúnleri Sankt-Peterburg qalasında Ózbekstan-Rossiya regionlararalıq rektorlar konferenciyası bolıp ótti. Sankt-Peterburg mámleketlik universitetiniń Menedjment joqarı mektebinde ótkerilgen “Ózbekstan-Rossiya regionlararalıq rektorlar konferenciyası”nda Berdaq atındaǵı Qaraqalpaq mámleketlik universiteti rektorı, texnika ilimleri doktorı, professor A.Reymovta qatnastı.

Bul konferenciyada universitetimiz rektorı, professor A.Reymov bayanat jasap, mámleketimizde bilimlendiriw tarawında alıp barılıp atırǵan reformalar haqqında sonday-aq, universitetimizde professor-oqıtıwshılar, jas alımlar ushın jaratılǵan sharayatlar hám universitettiń materiallıq-texnikalıq bazası haqqında tanıstırıp ótti.

Bunnan soń, konferenciya qatnasıwshılarına Aralboyındaǵı qurǵaqshılıqtıń aldın alıw boyınsha Rossiyalıq alımlar menen qospa ilimiy izertlewlerdi keńeytiw, sonday-aq, awıl xojalıǵı tarawında suwdı tejewshi texnologiyalardı birgelikte islep shıǵıw boyınsha ilajlardı kúsheytiw, jas ilimpazlardı Rossiya Federaciyasınıń abıraylı joqarı oqıw orınlarına maqsetli aspirantura hám doktoranturaǵa jiberiwdi jolǵa qoyıw, zamanagóy talaplarǵa juwap beretuǵın ilimiy-pedagog kadrlar tayarlaw maqsetinde Rossiyanıń joqarı oqıw orınları, ilimiy-izertlew mákemeleriniń maman qánigeleri hámde ilimpazları menen universitet arasındaǵı qospa ilimiy qánigelestirilgen keńeslerdi shólkemlestiriw, sonıń menen birge, rus tili hám ádebiyatı kafedrası oqıtıwshıları ushın Rossiya Federaciyasınıń universitetlerinde tájiriybe kursların jolǵa qoyıw boyınsha óz usınısların bildirdi hám bul baǵdarda birge islesiwge tayar ekenin aytıp ótti.

QMU baspasóz xızmeti