Berdaq atındaǵı Qaraqalpaq mámleketlik universitetinde Qaraqalpaqstan Respublikası Ishki isler ministrligi xızmetkerleri universitet juwaplı xızmetkerleri, tyutorlar menen «Jaslar arasındaǵı júz berip atırǵan jınayatshılıqtıń túrleri hám onıń aldın alıw ilajları» haqqında májilis bolıp ótti. Qaraqalpaqstan Respublikası Ishki isler ministrligi Jámiyetlik qáwipsizlik xızmeti, huqıqbuzarlıqlar profilaktikası basqarması baslıǵı, podpolkovnik R.Eshimbetov, Qaraqalpaqstan Respublikası Ishki isler ministrligi operativ qıdırıw xızmeti, Kiber qáwipsizlik bólimi baslıǵı D.Seytmuratov, Qaraqalpaqstan Respublikası Ishki isler ministrligi operativ qıdırıw xızmeti, jınayat qıdırıw basqarması aǵa operativ wákili J.Edenbaev, Nókis qalalıq Ishki isler organları jumısların muwapıqlastırıw basqarması baslıǵı orınbasarı A.Babajanov, Nókis qalalıq Ishki isler organları jumısların muwapıqlastırıw basqarması organ xızmetkerleri hám Qaraqalpaq mámleketlik universiteti fakultet dekan orınbasarları, hayal-qızlar máseleleri boyınsha dekan másláhátshileri, topar tyutorları hám jaslar jetekshileri qatnastı. Májilisti Jaslar másleleri hám ruwxıy-aǵartıwshılıq isleri boyınsha prorektor S.Alawatdinov ashıp berdi hám alıp bardı.
Ilajda bayanatshılar «Jaslar arasında, ásirese, studentler arasında júz berip atırǵan huqıqbuzarlıq hám jınayatshılıqtı saplastırıw máseleleri», «Sociallıq tarmaqlar yaki kiberqáwipsizlik haqqında túsinik» atamalarındaǵı óz bayanatların oqıp esittirip, huqıqbuzarlıq hám jınayatshılıqtıń aldın alıw boyınsha mámleketimizde bir qansha reformalar ámelge asırılıp atırǵanlıǵı, qabıl etilip atırǵan huqıqıy-normativ hújjetler, jaslardıń huqıqıy mádeniyatın joqarılatıw, puqaralardıń nızamǵa boysınıwları, huqıqbuzarlıq hám jınayatshılıqqa qarsı gúresiw arqalı jámiyetlik tártipti hám qáwipsizlikti saqlaw máseleleri, jınayatshılıqtıń erte aldın alıw zárúrligi, júz beriwi múmkin bolǵan huqıqbuzarlıqlar aqıbetinde elimiz ekonomikasına keltiriletuǵın zıyanlar, búgingi kúnde jaslar tárepinen islenip atırǵan jınayatlar, kafe-restoranlarda spirtli ishimlikler iship jánjellesiw halatları, avtoavariyalar, bir-birine dene jaraqatların jetkeriw hám basqa da hár túrli jınayıy islerge qol urıp, jınayıy juwapkershilikke tartılıwdıń aqıbetleri haqqında atap ótti.
Ótkerilgen ilajdıń tiykarǵı maqseti jaslar arasında huqıqbuzarlıq hám jınayatshılıqtıń erte aldın alıw boyınsha keńnen úgit-násiyatlaw jumısların alıp barıw, sonıń menen birge jaslardı zárúr maǵlıwmatlar menen tanıstırıp barıw bolıp tabıladı.
QMU baspasóz xızmeti
