Berdaq atındaǵı Qaraqalpaq mámleketlik universitetinde repressiya qurbanların eslew boyınsha ushırasıw bolıp otti. Onda Qaraqalpaqstan Respublikası Prokuraturası sociallıq tarawda nızamshılıq ústinen baqlaw bólimi aǵa prokurorı R.Jalǵasbaev, Ózbekstan Ilimler akademiyası Qaraqalpaqstan bólimi Gumanitar pánler ilim izertlew institutı ilmiy xızmetkeri, tariyx ilimleriniń doktorı S.Nurjanov, Qaraqalpaq mámleketlik universiteti janındaǵı Repressiya qurbanların eslew muzeyi direktorı, tariyx ilimleri kandidatı, docent A.Kudiyarovlar hám student-jaslar qatnastı. Ushırasıwdı repressiya qurbanların eslew muzeyi direktorı A.Kudiyarov alıp bardı hám ol óz sózinde Húrmetli Prezidentimizdiń repressiya qurbanları muzeyi «Bul muzey – muzeylerdiń muzeyi» ásirese, jaslar tárbiyasındaǵı áhmiyeti joqarı ekenligi, ata-babalarımızdıń Watanımızdıń tınıshlıǵı hám azatlıǵı jolındaǵı gúresi – búgingi kún jasları ushın ibrat mektebi boladı dep joqarı baha bergenligin aytıp ótti.
Bunnan soń, sózge shıqqanlar, repressiya siyasatı sebepli xalqtıń aldıńǵı qatarlı ziyalılarınan ayırılǵanlıǵı, ásirese milliy kadrlarınıń qáliplesiwine hám rawajlanıwında unamsız tásir etkenligi, mámleket basqarıwda jergilikli kánigelerdiń jetispewshiligi nátiyjesinde rus qánigeleriniń respublikamızdı basqarıwı haqqında aytıp ótti. Sonıń menen birge baspa sóz materialları tiykarında 1934-1938-jıl jıllardaǵı repressiyalıq siyasattıń barısı, 1938-jıl 13-oktyabrge shekemgi repressiyalıq siyasat rejeleriniń islep shıǵılıw barısı, bul rejelerdiń háddet tıs orınlanıwı haqqında maǵlıwmatlar berip ótti. Ilajda student-jaslar ózleriniń qızıqtırǵan sorawlarına juwaplar aldı.
Bunday ilajlardı ótkeriwdegi tiykarǵı maqset usı dáwirdegi tariyxıy waqıyalardı tereńrek biliwge, tariyxıy waqıyalarǵa durıs baha beriwde, xalqımızdıń ziyalı perzentleriniń atın máńgilestiriwde, jaslardı watansúyiwshilik ruwxında tárbiyalaw bolıp tabıladı.
