Búgin 28-sentyabr kúni Qaraqalpaqstan Respublikası Málimleme-kitapxana orayında «Insanǵa itibar hám sapalı bilimlendiriw jılı»na baǵıshlanıp «Sapalı tálim-tárbiya – bas maqsetimiz» atamasında sáwbetlesiw keshesi bolıp ótti. Keshede Prezident stipendiyası iyesi, Tariyx qánigeligi 1-kurs magistrantı, «Úlgili jaslar klubı» quramındaǵı «Jas ilimpazlar» dógeregi lideri X.Utemuratova óziniń ilim hám bilimlendiriwge baylanıslı tayarlap kelgen prezentaciyası menen shıǵıp sóylep, jıynalǵanlarǵa óziniń oqıw dáwirinde qolǵa kirgizgen jetiskenlikleri haqqında aytıp ótti.

Sonday-aq, ilajda Tariyx fakulteti tyutorları B.Esemuratova hám G.Esboganovalar shıǵıp sóylep, tálim-tárbiyanıń kámil insandı qáliplestiriwdegi ornı hám áhmiyeti haqqında bahalı pikirleri menen ortaqlastı. Keshe dawamında «Qaraqalpaqstan Respublikası Málimleme-kitapxana orayı» xızmetkerleri, universitettiń Tariyx fakulteti tyutorları hám 1-kurs studentleri, sonday-aq, keshege miyman sıpatında qatnasqan Ózbekstan Ishki isler ministrligi Qaraqalpaq akademiyalıq liceyi oqıtıwshıları hám oqıwshıları kún tártibindegi másele boyınsha óz-ara pikir almastı.

G.Esboganova, Qaraqalpaq mámleketlik universiteti

Tariyx fakultetiniń tyutorı