Berdaq atındaǵı Qaraqalpaq mámleketlik universiteti Tariyx fakultetiniń «Úlgili jaslar» klubı quramındaǵı «Jas ilimpazlar» dógeregi aǵzaları ortasında 29-sentyabr kúni «Jas ilimpazlar sárdarı» tańlawı ótkerildi. Tańlaw klub lideri QMU Magistratura bólimi tariyx qánigeligi magistrantı Xanna Utemuratova baslaması menen ótkerilip, oǵan universitettiń Jaslar menen islesiw, ruwxıylıq-aǵartıwshılıq bólimi metodisti Salamatdin Pirniyazov, tariyx fakulteti tyutorları Baxıtgúl Esemuratova hám Gúlziyra Esboǵanovalar qatnastı. Tańlaw tiykarınan klub shólkemlestirilgennen baslap ilimiy dóretiwshilik jumısları nátiyjesinde bir qatar jetiskenliklerge erisip kiyatırǵan student-jaslar ushın bolıp, 2 shárt boyınsha ótkerildi. Birinshi shártte sárdarlıqqa talabanlar Ilimiy jetiskenlikleri sáwlelengen prezentacıya menen qatnasqan bolsa, ekinshi shártte «Ilimiy maqala qalay jazıladı?» temasında kishi seminar-trening ótiw talabı qoyıldı. Tańlaw juwmaǵında 1-orınǵa Tariyx fakulteti tariyx tálim baǵdarı 3-basqısh studenti Malika Otarbaeva, 2 hám 3-orınlarǵa filosofiya tálim baǵdarı 3-basqısh studentleri Numanova Sarbinaz hám Ómirbayev Sultanbekler múnasip dep tabıldı. Tańlaw sońında jeńimpazlar diplom menen sıylıqlandı.

Baxıtgúl Esemuratova,
Qaraqalpaq mámleketlik universiteti
Tariyx fakultetiniń tyutorı