Usı jıldıń 28-sentyabr sánesinde Sanaat texnologiyası fakultetinde bilim alıp atırǵan student jaslardıń ata-anaları menen ushırasıw keshesi bolıp ótti. Ushırasıwdı fakultet dekanı R.Kurbaniyazov kiris sóz benen ashıp berip hám basqarıp bardı. Ol óz sózinde Joqarǵı bilimlendiriw sistemasında bolıp atırǵan jańalıqlar, universitette studentler ushın jaratılǵan imkaniyatlar menen ata-analardı tanıstırdı. Bunnan soń, professor-oqıtıwshılardıń ata-analar menen birge tálim-tárbiya jumısların jáne de jaqsılaw, Sanaat texnologiyası fakulteti studentleri ushın ámeldegi kredit modul sisteması hámde hemis platformasına studentlerdiń maǵlıwmatlarınıń jaylastırılıwı haqqında tolıq maǵlıwmatlar berdi.
Kún tártibindegi másele boyınsha fakultet dekan orınbasarları Sh.Musirov, Ǵ.Allaniyazovlar sózge shıǵıp student-jaslardı milliy ideologiyaǵa sadıq etip tárbiyalaw, student-jaslar arasında huqıqbuzarlıq, jınayatshılıq hám náshebentlikke qarsı gúresiwge, kiyiniw mádeniyatı, ǵalabalıq qáwipler kórinislerinin jaslar tárbiyasına keri tásiri hám onıń aldın alıwǵa qaratılǵan wazıypalar haqqında aytılıp ótildi.
Sonday-aq, ushırasıwda student-jaslardıń bos waqıtların mazmunlı hám kewilli ótkeriw, studentlerdiń sabaq tayarlaw, óz ústinde jumıs islewi, dem alıwı, sport, hám basqa dógerek, klublarǵa qatnasıwı ushın universitette jaratılǵan barlıq sharayatlar (internet xanaları, sport sekciyaları, klubları, dógerekler, studentler turar jayındaǵı sharayatlar) haqqında ata-analarǵa maǵlıwmatlar berildi. Student-jaslardıń bunday imkaniyatlardan durıs paydalanıwları hám studentlerdiń oqıw dáwirinde professor-óqıtıwshılar hám oqıwdan tıs waqıtlarda ata-analar perzentlerin qatań qadaǵalaw kerekligi haqqında ayrıqsha toqtap ótildi. Ushırasıw keshesinde ata-analarǵa perzentleriniń erisken tabısları, ayırım jaslar tárepinen jol qoyılǵan kemshilikler haqqında tolıq maǵlıwmatlar berildi hám ushırasıwǵa kelgen ata-analarǵa minnetdarshılıq bildirildi.
Sonıń menen birge bayanatshılar studentlerdiń kontrakt tólemmleri, boyınshada ata-analarǵa keńnen tusinikler berip ótti hám studentlerdiń bilim alıwında, tálim-tárbiya jumıslarıda ata-analardıń tutqan ornı, fakultetdegi professor oqıtıwshılardıń sabaq beriw metodları haqqında aytıp jıynalıs barısında aytılǵan maǵlıwmatlarǵa óziniń pikir hám usınısların bildirdi. Kún tártibindegi máseleler boyınsha bayanatshılarǵa ata-analar ózleriniń qızıqtırǵan sorawların berdi hám tiyisli juwaplar aldı.
