Búgin 7-oktyabr kuni Qaraqalpaq mámleketlik universiteti studentleri hám magistrantları qatnasıwında Ózbekstan Respublikası Prezidenti Sh.M.Mirziyoyevtıń 2018-jıl 7-maydaǵı №PQ 3698-sanlı «Ekonomika tarmaqları hám tarawlarına innovaciyalardı engiziw mexanizmlerin jetilistiriw boyınsha qosımsha is-ilájlar haqqında»ǵı qararı hámde 2023-jıl 9-avgusttaǵı «Student hám jaslardıń bos waqıtların mazmunlı ótkeriw ilajların shólkemlestiriw haqqında»ǵı №351-sanlı buyrıǵı tiykarında student jaslardıń innovaciyalıq dóretiwshilik qábiletin júzege shıǵarıw,  intellektuallıq dárejesin rawajlandırıw, olardı qollap-quwatlaw, izleniwshilik sheberliklerin asırıw maqsetinde «Meniń startap joybarım» tańlawı ótkerildi.

Tańlawdı Qaraqalpaq mámleketlik universiteti Ilimiy isler hám innovaciyalar boyınsha prorektorı Turdimambetov Izimbet Raxmetovich kiris sóz benen ashıp berdi, tańlawdıń áhmiyeti hám ótkeriliw tártipleri haqqında toqtalıp, tańlaw qatnasıwshılarına tabıslar tiledi. Bul tańlawǵa student jaslardan 30 dan aslam innovaciyalıq joybarlar kelip túsken bolsa, sonıń ishinde 18 talaban tańlawdıń juwmaqlawshı basqıshında óz joybarları menen qatnastı.

Tańlaw juwmaǵına kóre, Matematika fakulteti 4-basqısh studenti Kogambaev Asadbek “Sanlı tipografiya “MasterPrint”” joybarı menen 1-orındı jeńip alǵan bolsa, eki student: Arxitektura fakulteti 4-basqısh studenti Piyshenbaev Qarjawbay “Geweklestirilgen beton buyımlardı tayarlaw usılı” joybarı menen hámde Biologiya fakulteti 3-basqısh studenti Tadjimov Akmal “Vermikompostlawdı avtomatlastırıw” joybarı menen 2-orınǵa múnásip kórildi.  Óz islenbeleri menen tańlawǵa belsendi qatnasqan jáne úsh student: Matematika fakulteti 1-basqısh magistrantı Adilbaeva Nilufar “Imkan” joybarı menen,  Shet tiller fakulteti 1-basqısh magistrantı Tajimuratova Ziyuar “Visit Karakalpakstan” joybarı menen hámde Matematika fakulteti 4-basqısh studenti Baymuratov Amir “Smart mirror” joybarı menen 3-orındı jeńip aldı.

Tańlaw shártlerine kóre, jeńimpazlar universitettiń “Innovaciyalıq fondı” ǵárejetleri esabınan aqshalay sıylıqlanadı. Sonday-aq, tańlaw jeńimpazlarınıń joybarları Ózbekstan Respublikası Joqarı bilimlendiriw, ilim hám innovaciyalar ministrligi janındaǵı Innovaciyalıq rawajlanıw agentligi tárepinen ótkeriletuǵın respublikalıq tańlawlarǵa jiberiledi.

Zulfiya Seytbekova

Dene mádeniyatı fakulteti Hayal-qızlar sportı 2-kurs studenti