Usı jıldıń 9-10-oktyabr kúnleri Berdaq atındaǵı Qaraqalpaq mámleketlik universitetinde Ózbekstan Respublikası Joqarı bilimlendiriw, ilim hám innovaciyalar ministrligi baslaması menen Jáhán bankiniń “Ózbekstan milliy innovaсiya sistemasın modernizatsiya etiw” (MUNIS) joybarı sheńberinde eki kúnge mólsherlengen “Texnologiyalardı kommerciyalizaciyalastırıw hám startap joybarlardı ámelge asırıw” atamsında seminar-treningi ótkerildi.

Seminar-trening Jáhán banki koncultantı, texnologiyalardı kommerciyalizaciyalastırıw hám biznesti jolǵa qoyıw boyınsha 20 jıllıq tájiriybege iye bolǵan xalıqaralıq ekspert Sergey Makarov tárepinen alıp barıldı. Treningge Ózbekstan Respublikası Joqarı bilimlendiriw, ilim hám innovaciyalar ministrligi qánigeleri, Qaraqalpaqstan Respublikasındaǵı barlıq joqarı joqarı oqıw orınları hám ilim-izertlew institutlarınıń professor-oqıtıwshıları, jas alımlar, doktorantlar, ziyrek studentler qatnastı.

Seminar-treningti ótkeriwden tiykarǵı maqset aymaqlardaǵı ilimiy-texnikalıq izertlewlerge qızıǵıwshı jas alımlar hám isbilermenlerdi qollap-quwatlaw arqalı texnologiyalardı kommerciyalizaciyalastırıw hám startap joybarlardı ámelge asırıw tarawındaǵı kónlikpelerdi qáliplestiriw hám bekkemlew, sonday-aq, MUNIS joybarınıń investiciyalıq baǵdarlamalarında qatnasıw ushın izertlewshiler auditoriyasın jáne de keńeytiw bolıp tabıladı.

Seminar-trening eki kún dawamında kóterińki ruwxta, qızǵın pikir almasıwlarǵa bay tárizde ótkerildi hámde barlıq qatnasıwshılar startap joybarların islep shıǵıw, onı ámelge asırıw basqıshları boyınsha ózlerin qızıqtırǵan sorawlarına tiyisli juwapların aldı.