Berdaq atındaǵı Qaraqalpaq mámleketlik universitetiniń májilisler zalında Nókis rayonı sudı baslıǵı A.Seytanovtıń basshılıǵında kóshpeli ashıq sud májilisi bolıp ótti. Onda universitettiń professor-oqıtıwshıları hám student-jaslar qatnastı. Sudta baasshılıq etiwshi dáslepki tergew organı tárepinen sudlanıwshı Muslimanıń (atı ózgertilgen) jınayıy is háreketleri Ózbekstan Respublikası Jınayat Kodeksiniń 169-statyasınıń 3-bólimi «a» bánti menen durıs kvalifikaciya etilgen dep esapladı. Sebebi, ol urlıq jınayatın bir neshe mártebe tákirarlap islegen. Ózbekstan Respublikasi Jınayat-processual kodeksiniń 454-457, 460, 463, 465-468, 471-473, 476-statyalarına ámel etip, sud húkim etti. Oǵan bola sudlanıwshı Muslima Ózbekstan Respublikası Jınayat Kodeksiniń 169-statyası 3-bólimi «a» bántinde kórsetilgen jınayattı islegenlikte ayıplı dep tabılıp, oǵan usı statya boyınsha Jınayat Kodeksiniń 57-statyasın qollanıp 2 (eki) jıl múddetke erkinen ayırıw jazası tayınlandı, ol bul jazanı ulıwma tártiptegi koloniyalarda ótewi belgilendi. Sudlanıwshı Muslimaǵa qollanılǵan girew bas sharası biykar etilip, sud zalınan qamaqqa alındı. Jábirleniwshilerge keltirilgen 103.121.000 som materiallıq zıyanlar sudlanıwshıdan óndiriliwi belgilendi. Jábirleniwshilerge keltirilgen basqa materiallıq hám morallıq zıyanlardı sudlanıwshıdan óndirip alıw máselesi boyınsha, puqaralıq is júrgiziw tártibinde sudqa dawa arza qozǵaw huqıqı bar ekenligi túsindirildi. Húkimge nariyza tárepler húkim járiyalanǵan waqıttan baslap, sudlanıwshı hám jábirleniwshi húkim nusqasın alǵan kúnnen baslap 20 sutka ishinde usı sud arqalı Qaraqalpaqstan Respublikası sudı apellyaciya instanciyasına shaǵım arza beriwge, prokuror protest keltiriwge erikli ekenligi de maǵlıwmat sıpatında aytıp ótildi.
Bunnan soń, sudya tárepinen ashıq kóshpeli sud májilisi qatnasıwshılarına urlıq jınayatı hám huqıqıy aqıbetleri jóninde túsinik berildi. «Urlıq, urlıqtıń túbi xorlıq» degen naqıl otkerilgen kóshpeli sud processiniń ayqın bir mısalı ekenligi aytıp ótildi. Sonday-aq, orınlarda keń jámiyetshiliktiń qatnasıwında ótkerilip atırǵan bunday ashıq sud májilisinlerinen maqset jınayatshını hámmege tanıstırıp, masqara etiw emes, al aramızda bolıp atırǵan waqıya hádiyselerge biyparwa bolmay, eger qandayda bir nızambuzıwshılıq yaki huqıqbuzarlıq jaǵdayları júz berse dárhál tiyisli organlarǵa xabar berip, kewilsiz jaǵdaydıń, usınday jınayatlardıń aldın alıwǵa shaqırıw, ilgeri qılmıs islegen adamlar menen turaqlı profilaktikalıq sáwbetler ótkerip, olardı paydalı miynet penen shuǵıllanıwǵa iytermelew hám álbette hár bir isten durıs juwmaq shıǵarıwǵa shaqırıw.
Azat Seytanov,
Jınayat isleri boyınsha Nókis rayonı sudı baslıǵı
