Mádeniy miyraslar xalıqtıń rawajlanıw jolınıń belgili basqıshınıń aynası bolıwı menen birge, keleshek áwladtıń ruwxıy jaqtan jetilsiwine óziniń unamlı tásirin kórsetedi. Zamanagóy talaplar dárejesindegi qánigelerdi tayarlawda shet eldiń aldıńǵı tájiriybelerin úyreniw hám bul tarawda birge islesiwdi jolǵa qoyıw baslı áhmiyetke iye esaplanadı.
Usı tiykarda Rossiya ilimler akdemiyasi Shıgıstanıw insituti professorı Balaxvancev Arshil Savelish universitetimizde boldı. Bul jerde universitettiń oqıw isleri boyınsha prorektorı O.Dúysenbaev penen ushırasıp, izertlewler alıp barılatuǵın arxeologiyalıq estelikler, sonday-aq, keleshekte birgelikte ámelge asırlatuǵın xalıqaralıq ekspediciyalar boyınsha sáwbetlesip, aldaǵı waqıtları birge islesiwdi dawam ettiriw maqsetinde kelsim shártnamaları dúzildi.
Bunnan gózlengen baslı maqset, xalıqaralıq birge islesiw tiykarında ilim izertlew tarawında shet el mámleketleri ilim izertlew institutları menen ózara sherikshilikti rawajlandırıw, tálim xızmetlerin integraciyalaw hám de dúnya málimleme ilim tarawında universitetimizdiń abıroyın asırıw, sonday-aq, xalıqaralıq sherikshilikti jáne de keńeyttiriwden ibarat.
Sonıń menen birge, Qaraqalpaq Mamleketlik Universiteti Tariyx fakulteti Arxeologiya kafedrası professor-oqtıwshıları menen ushırasıp, ushrasıw dawamında Qaraqalpaqstan aymagındaǵı eski qalalarda izertlew jumısların birgelikte ámelge asırıw boyınsha xalıq-aralıq kólemdegi arxeologiyaliq qazıw jumısların alıp barıw, óz-ara tájiriybeler almasıw, web of science bazasında birgelikte maqalalar shıǵarıw, tálim procesine zamanagóy innovaciyalıq texnologiyalardı engiziw, eń baslısı kadrlar tayarlaw sıpatın asırıw boyınsha rejeler belgilenip alındı.
Álbette bul sıyaqlı iygilikli islerden, xalıqaralıq sherikshilik hám ózara tájiriybeler almasıwlardan alınǵan bilim hám kónlikpeler arxeologiya ilimin oqıtıwda, ekspediciyalar shólkemlestiriwde shet el mámleketleri tájiriybelerin ámelde qollaw imkaniyatın jaratıp beredi.
Ata-babalarımızdan miyras bay mádeniy estelikler haqqındaǵı maǵlıwmatlardı ilimiy jaqtan jáne de bayıtıw, jańalıqlar ashıw kelesheginen úmit kúttiretuǵın joqarı intellektual hám ruwxıy potencialǵa iye bolǵan, dúnya kóleminde óz teńleslerine hesh qaysı tarawda da bos kelmeytuǵın jetik kadrlardıń ádiwli minnetine aylanbaqta.
