Usı jıldıń 27-oktyabr kúni Shet tilleri fakultetinde professor-oqıtıwshılar arasında «Scopus ilimiy texnikalıq bazasınan paydalanıw hám isenimli jurnallardı tabıw kónlikpelerin qáliplestiriw» atamasında seminar shólkemlestirildi. Ótkerilgen seminarda fakultet dekanı Dj.Kurbanbaev basqarıp bardı hám ol óz sózinde mámleketimiz tárepinen búgingi kúndegi ilimge degen itibardıń ayrıqsha ekenligin atap ótti. Bunnan keyin QMU Xalıqaralıq reyting iskerligin monitoring qılıw bólimi baslıǵı I.Joldasbaev hám Sanlı bilimlendiriw texnologiyaları orayı web dizayneri N.Nukusbaevlar tárepinen professor-oqıtıwshılardıń baspadan shıǵarıw belsendiligin asırıw, xalıq aralıq maǵlıwmatlar bazalarında maqalalar sanın kóbeytiw hám ilimiy izertlewlerdi rawajlandırıw maqsetinde Web of Science, Springer Nature, Scopus sıyaqlı xalıq aralıq ilimiy hám ilimiy-texnikalıq maǵlıwmatlar bazalarınan paydalanıw boyınsha oqıw seminar ótti. «Scopus-bul maǵlıwmatlar bazası, dúnya boylap túrli ilim tarawları boyınsha basılımlardı óz ishine qamtıp alǵan platforma esaplanadı hám bul bazada ilimiy miynetimizdi baspadan shıǵarıw arqalı kafedralardıń, qalaberse universitetimizdiń ilimiy potencialınıń joqarılawına óz úlesimizdi qosqan esaplanamız» – dedi taraw wákilleri óz sózinde. Qatnasıwshılar seminar dawamında izertlew nátiyjelerin xalıqaralıq jurnallarda járiyalawda ushırasıp atırǵan mashqalalar hám imkaniyatlar boyınsha óz-ara pikir almastı.

A.Kungratbaev, Shet tilleri fakulteti tyutorı