Búgin 1-noyabr kúni Polessk mámleket universiteti rektorı Valeriy Ivanovich Dunay Berdaq atındaǵı Qaraqalpaq mámleketlik universitetinde boldı. Dáslep miymandı universitet rektorı A.Reymov kútip alıp, jańa 1800 orınǵa mólsherlengen oqıw-laboratoriyası imaratınıń maketi hám ol jerde studentler ushın jaratılǵan qolaylıqlar menen tanıstırıp ótti.

Bunnan soń, eki oqıw ornı arasında birge islesiwdi elde rawajlandırıw boyınsha sáwbetlesiw alıp barıldı. Onda universitettiń oqıw isleri boyınsha prorektorı O.Dúysenbaev, Xalıqaralıq birge islesiw boyınsha prorektorı T.Nurımbetovlar qatnastı. Sáwbetlesiw barısında Berdaq atındaǵı Qaraqalpaq mámleketlik universiteti hám Polessk mámleket universiteti arasında xalıq aralıq birge islesiw, studentler, ilimiy xızmetkerler, oqıtıwshılardıń tájiriybe almasıwı, sonday-aq, lekciyalar, konferenciyalar, seminarlar ótkeriw, oqıw processin jetilistiriw, zamanagóy oqıtıw usılları hám sistemalarınan paydalanıw, bul tarawda innovaciyalıq texnologiyalardı qollaw boyınsha óz-ara shártnamalar dúzildi.

Ushırasıw dawamında Qaraqalpaq mámleketlik universiteti rektorı, texnika ilimleri doktorı Reymov Axmed Mambetkarimovich tárepinen Polessk mámleket universiteti rektorı Valeriy Ivanovich Dunayǵa «Qaraqalpaq mámleketlik universitetiniń Húrmetli professorı» ataǵı berilgenligi haqqındaǵı diplomdı saltanatlı túrde tapsırdı.

Ilaj juwmaǵında Valeriy Ivanovıch «Qaraqalpaq mámleketlik universitetiniń húrmetli professorı» ataǵın berip atırǵanı hám bunday úlken isenim ushın universitet rektorına, sonday-aq, jıynalǵanlarǵa óz minnetdarshılıǵın bildirip, aldaǵı waqıtları eki oqıw ornı arasında tájiriybe almasıw hám óz-ara birge islesiwge tayar ekenin aytıp ótti.

QMU baspasóz xızmeti