Nókis “Temurbekler mektebi” áskeriy-akademiyalıq liceyinde “Geografiya páni hám onıń áskeriy tarawlardaǵı ornı” atamasında seminar bolıp ótti. Bul seminarǵa Qaraqalpaq mámleketlik universiteti Geografiya hám tábiyiy resurslar fakulteti dekanı, geografiya ilimleriniń kandidatı, docent N.Embergenov, usı liceydiń oqıw isleri boyınsha direktor orınbasarı A.Ótegenov, licey oqıtıwshıları hám 1-kurs oqıwshıları qatnastı.

Seminardı liceydiń oqıw isleri boyınsha direktor orınbasarı A.Ótegenov kiris sóz benen ashtı hám alıp bardı. Bunnan soń, “Geografiya páni hám onıń áskeriy tarawlardaǵı ornı” atamasındaǵı bayanatı menen N.Embergenov sózge shıǵıp, dáslep geografiya páni hám onıń házirgi kúndegi jámiyettegi ornı haqqında sóz etti. Bunnan soń ol áskeriy geografiya, yaǵnıy áskeriy topografiya hám siyasıy geografiya pánleri boyınsha, onıń házirgi kúndegi áskeriy tarawlardaǵı ornı haqqında oqıwshılarǵa keńnen túsinik berip ótti. Sonıń menen birge, oqıwshılar áskeriy tarawlarda islewshi xızmetkerler ushın geografiyalıq bilimlerdiń, ásirese onıń ámeliyattaǵı ornı oǵada úlken áhmiyetke iye ekenligin aytıp, olar bayanatshıǵa ózleriniń tarawǵa baylanıslı qızıqtırǵan sorawların berdi. Ushırasıw oǵada qızıqlı bolıp ótti.

Bunday seminarlardıń shólkemlestiriliwi jaslarımız sanasında áskeriy-geografiyalıq bilimlerdiń qáliplesiwine, ózimiz jasap turǵan Watandı súyiw hám onı qorǵawǵa degen sezimleriniń kúsheyiwine alıp keledi. Sonday-aq, bayanatshı oqıwshılarǵa turmısta óz orınların tabıwları, jat illetlerden saqlanıwları ushın sport penen turaqlı túrde shuǵıllanıw, kóbirek kitaplar oqıw hám óz ústinde kóbirek islew kerekligi haqqında úgit-násiyatların aytıp ótti.

Nókis “Temurbekler mektebi”
áskeriy-akademiyalıq liceyiniń
Geografiya páni oqıtıwshısı: R.Uzaqbaeva