Xalqımızda «Bir perzentke jeti máhálle ata-ana» degen naqıl bar. Jaslardıń tálim-tárbiyası, olardı jedellik penen ámelge asırılıp atırǵan reformalarǵa biyparıq bolmay, milliy hám ulıwma insanıylıq qádiriyatlarımızǵa sadıq etip tárbiyalaw áhmiyetli máselelerdiń biri esaplanadı. Usı tiykarda búgin jıl 8-noyabr kúni Dene mádeniyatı fakultetinde «Qızlar tárbiyasında analardıń roli» atamasında úgit-násiyat ilajı bolıp ótti.
Ilajǵa Hayal-qızlar máseleleri boyınsha rektor másláhátshisi I.Seytnazarova, Qaraqalpaqstan Respublikasına miyneti sińgen mádeniyat xızmetkeri, shayır G.Dáwletova, Fakultetler aralıq dene mádeniyatı kafedrası úlken oqıtıwshısı, nuranıy ustaz A.Ismaylova, tyutorlar hám student-qızlar qatnastı. Ilajdıń maqseti student-qızlar arasında tálim-tárbiya máselesi, kelin bolıp, balalı bolıp, tálim alıp atırǵan student-qızlarǵa, kelinsheklerge jol joba kórsetiw bolıp tabıladı. Ilajda nuranıy ustazlarımız qızlarǵa ózleriniń ómir jolı, miynet iskerligi, ómirdiń ashshı hám dushshı kúnleri, sabırlılıq haqqındaǵı tárbiyalıq másláhátlerin berdi. Ushırasıw qızǵın soraw-juwaplarǵa bay boldı. Bunday ilajlar jaslarımızdıń keleshekte óz ornın tabıwına, milliy mentalitetimizge say hám baxıtlı shańaraq uytqıları bolıwına járdem beriwi sózsiz.
N.Aytniyazova
Dene mádeniyatı fakulteti tyutorı
