Búgin Qaraqalpaq mámleketlik universitetiniń sırtqı bólim student-jaslar menen jaslar arasında jınayatshılıq hám huqıqbuzarlıqlardıń aldın alıwǵa baǵıshlanǵan úgit-násiyat ilajı bolıp ótti. Onda universitettiń jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov, hayal-qızlar máseleleri boyınsha rektor másláhátshisi I.Seytnazarovalar qatnastı.

Ushırasıwdı Sırtqı bólim baslıǵı S.Mırzataev ashıp berdi hám alıp bardı. Dáslep universitettiń jaslar máseleleri, ruwxıylıq-aǵartıwshılıq isleri boyınsha prorektor S.Alawatdinov sózge shıǵıp, jaslardıń huqıqıy mádeniyatın arttırıw, olar arasında jınayatshılıq hám huqıqbuzarlıqlardıń aldın alıw, ásirese, studentler arasında júz berip atırǵan huqıqbuzarlıq hám jınayatshılıqtı saplastırıw máseleleri haqqında aytıp ótti.

Bunnan soń, sózge shıqqanlar, sociallıq tarmaqlardan durıs paydalanıw, jámiyette júris-turıs qaǵıydaları, tártip intizam, jol transport háreketi hám onnan paydalanıw qáwipsizligi qaǵıydaları, sonday-aq, student-jaslar arasında jınayatshılıq hám huqıqbuzarlıqtıń aldın alıwǵa, onı boldırmawǵa birgelikte gúresiwge shaqırdı. Ótkerilgen ushırasıwdıń tiykarǵı maqseti jaslar arasında huqıqbuzarlıq hám jınayatshılıqtıń erte aldın alıw boyınsha keńnen úgit-násiyatlaw jumısların alıp barıw, sonıń menen birge jaslardı zárúr maǵlıwmatlar menen tanıstırıp barıw bolıp tabıladı.