Birlesken Milletler Shólkemi 1954-jılǵı rezolyuciyasında barlıq mámleketlerge 20-noyabr kúnin Jer júzilik bala kúni sıpatında nıshanlawdı usınǵan. Sonday-aq, 1959-jıl 20-noyabr kúni «Bala huqıqları haqqındaǵı Deklaraciya», 1989-jılda «Bala huqıqları haqqındaǵı Konvenciya» qabıl etilgen.

Sáne múnásibet menen Berdaq atındaǵı Qaraqalpaq mámleketlik universiteti Dene mádeniyatı fakulteti tyutorları hám student-jaslar tárepinen Taqıyatas rayonında jaylasqan «Balalar úyi»nde “Hesh kim mehir hám itibardan shette qalmaydı” atamasında qayırqomlıq ilajın ótkerdi. Tyutorlar, studentler «Balalar úyi» tárbiyalanıwshıları menen ushırasıp, olarǵa kitapshalar, kúndelikli turmıslıq buyımlar, sonday-aq, hár túrli oyınshıq sawǵaları hám de konditer ónimleri bolǵan azıq-awqatlıq zatların tapsırdı. Ilaj dawamında «Balalar úyi» jámááti tyutorlar hám student-jaslarǵa óz minnetdarshılıqların bildirdi.

Ilajdıń tiykarǵı maqseti dúnya boylap ámelge asırılatuǵın dástúr hám joybarlarda balalardıń mápleri, olardıń huqıqları inabatqa alınıwı, elimizde balalardıń qádir-qımbatın qorǵawshı nızamlar hám de principlerdiń orınlanıwın támiyinlew, sonday-aq, hámme ushın ashıq hám doslıq jámiyetti qurıwdan ibarat bolıp tabıladı.

R.Óteniyazov Dene mádeniyatı fakultetiniń

jaslar menen islesiw boyınsha dekan orınbasarı