Búgin 30-noyabr kúni Berdaq atındaǵı Qaraqalpaq mámleketlik universitetinde “Jawızlıqqa qarsı aǵartıwshılıq” atamasında ilaj ótkerildi. Onda Ózbekstan Respublikası Ministrler Kabineti janındaǵı Imom Buxoriy Xalıqaralıq ilimiy-izertlew orayı ilimiy xızmetkerleri J.Jumaev, A.Mamadaliev hám student-jaslar qatnastı.

Dáslep ilajdı universitet Xalıqaralıq birge islesiw boyınsha prorektorı T.Nurımbetov ashıp berdi hám basqarıp bardı. Ilajda sózge shıqqanlar, jámiyetimizde social-mádeniy ortalıqtı qáliplestiriw, diniy keńpeyillikti hám milletlerara tatıwlıqtı bekkemlew, student-jaslar arasında jat illetlerge qarsı immunitetti qáliplestiriw, jawızlıqqa qarsı gúresiwdiń birden-bir tuwrı jolı kitap oqıw, bilim alıw kerek ekenligin ayrıqsha atap ótti.

Haqıyqatında da «Jawızlıqqa qarsı – aǵartıwshılıq» principi tiykarında ósip kiyatırǵan jaslarımızdı salamat isenim ruwxında tárbiyalaw búgingi kúnniń áhmiyetli máseleleriniń biri bolıp tabıladı. Ilaj sońında student-jaslar ózlerin qızıqtırǵan sorawlarǵa juwap aldı.