3-dekabr – Xalıqaralıq mayıplar kúni múnásibeti menen búgin Berdaq atındaǵı Qaraqalpaq mámleketlik universitetinde bayram ilajı bolıp ótti. Onda universitetimiz rektorı A.Reymov, universitet hayal-qızlar máseleleri boyınsha rektor másláhátshisi I.Seytnazarova hám student-jaslar qatnastı.

Ushırasıwda rektor A.Reymov sózge shıǵıp, oqıw dárgayımızda mayıplıǵı bolǵan studentlerimizge jaratılıp atırǵan sharayatlar haqqında toqtalıp, olardıń bilim alıwı, den sawlıǵın qayta tiklewi ushın Mámleketimiz tárepinen keń kólemli jumıslar ámelge asırılıp atırıǵanlıǵın atap ótti.

Ilajda rektor A.Reymov universitette oqıp atırǵan mayıplıǵı bolǵan student-jaslar menen sáwbetlesip, olardıń mashqalaları hám pikir usınısların tıńladı. Sonday-aq, búgingi bayram menen qutlıqlap, olarǵa universitet rektoratı tárepinen bayram sawǵası sıpatında qarjılay sıylıqlar tapsırdı. Ilaj dawamında student-jaslar universitet rektoratı tárepinen kórsetilip atırǵan bunday itibar hám ǵamxorlıqtan sheksiz quwanıshta ekenligin aytıp, óz minnetdarshılıqların bildirdi. Bunnan soń, bayram ilajı universitetimiz Kórkem óner fakutet student-jasları tárepinen tayarlanǵan koncert baǵdarlaması menen dawam etti.

Haqıyqatında da mayıplıǵı bolǵan, sociallıq qorǵawǵa mútáj puqaralardı qollap-quwatlaw, olarǵa járdem beriw sıyaqlı insanıylıq pazıyletler ázel-ázelden ruwxıy sanamızǵa sińip, ullı qádiriyatlarımızdıń birine aylanǵan.

QMU baspasóz xızmeti