Qaraqalpaqstan Respublikası prokuraturası baslaması menen Ózbekstan Respublikası Konstituciyasınıń qabıl etilgenliginiń 31 jıllıǵı múnásibeti menen Berdaq atındaǵı Qaraqalpaq mámleketlik universiteti Yuridika fakultetinde «Zakovat Quiz» intellektual oyını ótkerildi. Onda Qaraqalpaqstan Respublikası prokuraturası sociallıq tarawda nızamshılıq ústinen baqlaw bólimi aǵa prokurorı R.Jalǵasbaev, Yuridika fakulteti dekan orınbasarı B.Ermekbaevlar sózge shıǵıp, Konstituciya mámlekettiń tiykarǵı nızamı bolıp elimizde júz berip atırǵan jańalanıwlar, demokratiyalıq huqıqıy mámleket qurıw, ádil puqaralıq jámiyetin qáliplestiriw jolında erisip atırǵan jetiskenliklerimizdiń barlıǵı Konstituciyada kórsetilgen tiykarǵı principlerdiń turmısqa tolıq engiziliwi menen baylanıslı ekenligin atap ótti. Sonday-aq, professor-oqıtıwshılar hám student-jaslardı Ózbekstan Respublikası Konstituciyası qabıl etilgenligine 31-jıl tolıwı menen qızǵın qutlıqlap bárshe qatnasıwshılarǵa áwmet tiledi.
Bunnan soń, Yuridika fakulteti tyutorları hám olarǵa biriktirilgen student-jaslarınan ibarat jámi 18 topar komandaları arasında «Zakovat Quiz» intellektual oyınına start berildi. Qızıqlı sorawlar menen bir qatarda jańa redakciyada qabıl etilgen Konstituciyamızǵa kirgizilgen ózgerisler boyınsha da sorawlar boyınsha ózlerin tańlawda sınap kórdi. Oyın juwmaǵında 1-orındı Yuridika fakultet “102-topar” komandası, 2-orındı «103-topar» komandası, 3-orındı «101-topar» komandası iyeledi. Jeńimpazlar shólkemlestiriwshiler tárepinen múnásip xoshametlendi.
