Búgin Qaraqalpaq mámleketlik universiteti Tariyx fakultetiniń 1-kurs tariyx qánigeligi studentleri menen birgelikte 14-dekabr – Qaraqalpaqstan Respublikası Mámleketlik Bayraǵı qabıl etilgenine 31 jıl tolıwı múnásibeti menen «Bayraǵım – maqtanıshım, namısım!» atamasında bayram ilajı bolıp ótti. Bayram ilajı studentlerdiń Mámleketlik Gimndi saltanatlı túrde atqarıwı menen baslandı. Sońınan Tariyx fakulteti dekanınıń Jaslar máseleleri boyınsha orınbasarı Q.Najimov, Arxeologiya kafedrasınıń oqıtıwshısı R.Doshniyazov, fakultet tyutorları B.Esemuratova hám G.Esboganovalar shıǵıp sóyledi. Olar óz shıǵıp sóylewlerinde 1992-jılı 14-dekabr kúni Qaraqalpaqstan Respublikası Joqarǵı Keńesiniń XI sessiyasında «Qaraqalpaqstan Respublikasınıń mámleketlik bayraǵı haqqında»ǵı Nızam qabıl etilgenligi, mámleketlik nıshanlar, solardıń qatarında mámleketlik bayraqtıń xalqımız, ásirese jaslarda Watanǵa muhabbat, bay tariyxımızǵa, milliyligimizge tereń húrmetti qáliplestiriwde, perzentlerimizdiń hár tárepleme kámil hám jetik insanlar bolıp jetilisiwinde tárbiyalıq áhmiyetke iye ekenligin aytıp ótti. Ilaj dawamında studentler qánigelerden ózleri qızıqtırǵan sorawlarǵa juwaplar aldı. Bayram ilajı qızıqlı hám tásirli bolıp ótti.

Gúlzira Esboganova,
Qaraqalpaq mámleketlik universiteti
Tariyx fakultetiniń tyutorı